Elbasy Prezıdenttik orkestrdiń merekelik kontsertinde boldy
Memleket basshysy Qazaqstan Respýblıkasy Memlekettik kúzet qyzmetiniń barlyq qyzmetkerleri men ardagerlerin arnaýly memlekettik organnyń qurylýynyń 25 jyldyǵymen quttyqtap, Prezıdenttik orkestrdiń kásibı deńgeıiniń joǵary ekenin atap ótti.
Elbasy Memlekettik kúzet qyzmeti Qazaqstan Prezıdentiniń, elimizdiń basqa da laýazymdy tulǵalarynyń, sheteldik delegatsııasy basshylarynyń jáne memlekettik mańyzy bar nysandardyń qaýipsizdigin eń joǵary deńgeıde qamtamasyz etýshi kásibı memlekettik organ bolyp sanalatynyn aıtty.
Memlekettik kúzet qyzmeti Qazaqstan Respýblıkasy Prezıdentiniń 2014 jylǵy 21 sáýirdegi jarlyǵy boıynsha Prezıdenttiń kúzet qyzmeti men Ulttyq ulannyń qosylýy nátıjesinde quryldy. Qazaqstan táýelsizdik alǵannan beri bul memlekettik organ qalyptasyp, nyǵaıa tústi.
Merekelik kontsert baǵdarlamasy Qazaqstannyń táýelsizdigine jáne eldiń búginge deıingi jetistikterine arnalǵan.
Qazaqstan Respýblıkasy Memlekettik kúzet qyzmetiniń Prezıdenttik orkestri Qazaqstannyń hattamalyq, dıplomatııalyq, memlekettik jáne basqa da saltanatty is-sharalaryna atsalysady. Bul shyǵarmashylyq ujym óz repertýarynda folklordan bastap, klassıkalyq jáne akademııalyq mýzykalar men qazirgi zamanǵy kompozıtorlar týyndylaryna deıingi álemdik mýzyka mádenıetiniń barlyq janryn qamtıdy.