Elbasy polıak kásipkerleri úshin tartymdy salalardy atady

ASTANA. QazAqparat - Qazaqstan men Polsha kásipkerleri eki eldiń ekonomıkalyq qarym-qatynastaryn laıyqty deńgeıge kóterý úshin jumys isteýi tıis. Bul týraly búgin Aqordada Elbasy Nursultan Nazarbaev Polsha prezıdenti Andjeı Dýdamen keńeıtilgen quramdaǵy kelissózderden keıin birlesken málimdeme jasaý barysynda aıtty, dep habarlaıdy QazAqparat.

«Saýda-ekonomıkalyq saladaǵy kooperatsııany keńeıtýge aıryqsha nazar aýdaryldy. Sońǵy ýaqytta bul salada quldyraý baıqalady. Bizdiń iskerlik ortamyz ekonomıkalyq qarym-qatynastarymyzdy laıyqty deńgeıge kóterý úshin jumys isteýi tıis. Qazaqstan bıznestiń jumys isteýi úshin barlyq ońtaıly sharttardy jasady. Búginde bizdiń elimizde polıak kapıtalynyń qatysýymen 115 kásiporyn jumys isteıdi, 200 mln dollardan astam tikeleı ınvestıtsııa salynǵan. Mashına jasaý, aýyl sharýashylyǵy, energetıka men kólik salalarynyń tartymdy keleshegi bar», - dedi Nursultan Nazarbaev.

Osy oraıda Elbasy búgin elordada Qazaqstan-Polsha bıznes forýmnyń ótetindigin eske saldy.

«Bıznesmenderimiz ózara jańa kelisimsharttar jaıynda ýaǵdalasady dep oılaımyn. Biz eki el arasyndaǵy ekonomıkalyq ózara qarym-qatynastyń barlyq aspektilerin qaraıtyn bolamyz», - dedi Qazaqstan Prezıdenti.

Munan bólek Nursultan Nazarbaev Azııadan Eýropaǵa jáne keri baǵytta júkterdi jetkizýdi jedeldetý úshin zamanaýı kólik ınfraqurylymyn jasaý barysynda Qazaqstan men Polsha bir-birine kómek kórsetýge nıetti ekendigin aıtty.