Elbasy: Parlamenttiń aldaǵy basym mindeti - jer qoınaýy jáne jer qoınaýyn paıdalaný týraly zańdy qabyldaý
ASTANA. 2 qyrkúıek. QazAqparat - Parlamenttiń aldaǵy basym mindeti - jer qoınaýy jáne jer qoınaýyn paıdalaný týraly zańdy qabyldaý. Bul týraly búgin besinshi shaqyrylǵan Parlamenttiń úshinshi sessııasynyń ashylýynda Elbasy Nursultan Nazarbaev aıtty.
«Mańyzdy basym mindet - «Jer qoınaýy jáne jer qoınaýyn paıdalaný týraly» zańdy qabyldaý, zańdarǵa ózgertýler engizý. Onda barlaýǵa quqyq berý júıesin túbegeıli jeńildetý, jer qoınaýyn ónimsiz alypsatarlyq praktıkasynan qorǵaý qajet», - dedi Memleket basshysy.
QR Prezıdentiniń atap ótýinshe, keıbireýler kezinde jerdi menshigine alyp, áli kúnge deıin oǵan ınvestıtsııa quımaı otyr. Sondyqtanda bul jaıttyń aq-qarasyn ashý qajet. Jerdi paıdalanbaı otyrǵandardan memleketke qaıtaryp alyp, ony basqa ınvestorlarǵa berý qajet.
«Osylaısha, biz geologııalyq barlaýǵa jańa ınvestıtsııa tarta alatyn bolamyz. Men bul turǵyda iri strategııalyq ken oryndarynyń jumysyna qatysty tapsyrma berdim. Atap aıtqanda, kelisimshart jasaý kezinde bizdiń ekonomıkamyzdy ártaraptandyrýǵa járdemdesý turǵysynda ınvestorlarǵa mindetti talap qoıý tetikterin qarastyrý kerek», - dedi QR Prezıdenti.
