Elbasy: Parlament pen Úkimetke Prezıdenttiń 40-tan astam quzyreti ótedi

ASTANA. QazAqparat - Memleket basshysy bılik tarmaqtaryn úlestirý barysynda 40-qa tarta prezıdenttik quzyrettiń Parlamentke jáne Úkimetke beriletinin málim etti, dep xabarlaıdy QazAqparat.

"Aldaǵy reforma bizdiń damýdyń jáne jalpy qazirgi zamanǵy damý logıkasyna súıene otyryp jasaldy. Negizgi máni - Prezıdent óziniń birqatar quzyryn Parlament pen Úkimetke beredi. Myqty prezıdenttik bılik memlekettiń qalyptasý kezeńinde aýyr belesterdi ótkerý úshin asa qajet boldy. Ol óz ýaqytynda ózin-ózi aqtady. Bizdiń barlyq jetistikter osy júıeniń negizinde keldi", - dedi Elbasy Qazaqstan halqyna arnalǵan úndeýinde. 

Prezıdenttiń aıtýynsha, bul reforma basqarý júıesiniń tıimdiligin joǵarylatýǵa baǵyttalǵan.

"Biz jańa memleket, jańa ekonomıka, jańa qoǵam qurdyq. Bizdiń tańdaǵan jolymyzdyń durystyǵyn tarıxtyń ózi dáleldep berdi. Táýelsizdigimizdiń 25 jyldyǵyn atap ótý kezinde, biz eldiń jetistigin, sonyń ishinde bılik qurylymdarynyń, prezıdenttik júıeniń jetistigin sóz ettik. Degenmen álem qazir kóz aldymyzda ózgerip jatyr. Qoǵamdyq protsesterdiń jyldamdyǵy men qıyndyǵy Qazaqstanda da ulǵaıýda. Aldymyzǵa tarıxtyń ózi qoıatyn jahandyq jáne aımaqtyq qaýip-qaterlerdi qalaı qabyldaıtynymyzdy osy bastan oılaýymyz kerek", - dedi N. Nazarbaev.

Elbasynyń atap kórsetkenindeı, usynylyp otyrǵan reformanyń negizgi máni bılik quzyryn úlestirý, saıası júıeni jalpy demokratııalandyrý.

"Prezıdent úshin jańa jaǵdaılarda strategııalyq quzyr, bılik tarmaqtary arasyndaǵy joǵarǵy arbıtrdiń róli basymdyq bolady. Memleket basshysy, sondaı-aq, syrtqy saıasatqa, ulttyq qaýipsizdikke jáne eldiń qorǵanys qabiletine den qoıady. Óz kezeginde Parlament pen Úkimettiń róli artady. Atalmysh jumys eki negizgi baǵytta júrgiziledi. Birinshiden, Prezıdenttiń áleýmettik-ekonomıkalyq protsesterdi retteýdegi birshama ókilettikterin Úkimetke jáne basqa da atqarýshy organdarǵa bergen jón. Sonda bul salaǵa Úkimet, mınıstrlikter jáne ákimdikter tolyqtaı jaýap beretin bolady. Ókilettikterdi berý tıisti zańdardy ózgertý arqyly iske asady. Bul ózgeristerdi Úkimet qazirgi Parlamenttiń sessııanyń aıaǵyna deıin Parlamentke engizýi tıis.

Ekinshiden, odan da kúrdeli mindet - bılik tarmaqtary arasyndaǵy qarym-qatynasty konstıtýtsııalyq deńgeıde teńgerimdi etý", - dedi Prezıdent.

Elbasynyń sózinshe, Úkimet qurýda Parlament rólin, mınıstrlerdiń depýtattar aldyndaǵy jaýapkershiligin kúsheıtý asa mańyzdy. Parlamenttik saılaýda jeńiske jetken partııa Úkimet quramyn jasaqtaýda sheshimdi túrde áser ete alady. Osyǵan baılanysty, endi Úkimet ókilettigin burynǵydaı Prezıdent aldynda emes, Parlament aldynda toqtatýy zańdy bolady.