Elbasy ózine jazylǵan hattar men jazbalardy oqyp shyǵady – Úkibaı
A. Úkibaı Elbasy barlyq hatty oqýǵa úlgere me degen suraqqa jaýap bere otyryp: «Barlyq formatta jiberilgen hattar Elbasyǵa kelip túsedi. Árıne, ólsheýsiz kóp hat keledi, mundaı kólem buryn da bolǵan. Qyzmettik qujattardy qaraý arasyndaǵy úziliste Elbasy hattar men telegrammalardy, áleýmettik jelide jarııalanǵan jazbalardy muqııat oqyp shyǵady. Nursultan Nazarbaevqa jastardyń #ElbasymenBirge bastamasy unady dep aıta alamyn. Qazaqstannyń túpkir-túpkirinen, alys jáne jaqyn shet elderden kelip túsken qoldaý sózderi Tuńǵysh Prezıdentke kúsh-qýat berip jatyr», - dedi.
Sonymen birge, ol Elbasynyń shet memleketterde, alpaýyt saıasatkerler arasynda úlken bedelge ıe ekenin atap ótti.
«Vladımır Pýtın hat arqyly da, telefon arqyly da jyly lebizin bildirdi. Rejep Erdoǵan, Elbasyna degen qurmetpen tilegin qazaq tilinde jazǵan Maık Pompeo, Ortalyq Azııa elderiniń basshylary, Úndistannyń Premer-Mınıstri Narendra Modı jáne ózge de memleket basshylary habarlasty. Kópshiligi úshin Nursultan Nazarbaev jaqsy dos, jahandyq deńgeıdegi saıasatker úlgisi bolyp qala beredi. Ózim de birneshe ret baıqadym, kóptegen memleket basshylarymen kezdesýde Elbasy tilektes, senimdi qarym-qatynas qura aldy. Nursultan Nazarbaevtyń biregeı kópqyrlylyǵy adamdardy ózine tartatyn erekshe qasıetke ıe. Qazir de oǵan qurǵaq keńselik hat emes, shynaıy alańdaýshylyq pen qamqorlyqqa toly joldaýlar kelýde», - dedi Aıdos Úkibaı.
Sonymen birge, spıker Nursultan Nazarbaevtyń atyna eńbek sińirgen óner qaıratkerlerinen, JOO rektorlarynan, depýtattardan, qoǵam qaıratkerlerinen jáne kóptegen eńbek ujymdarynan telegrammalar kelip jatqanyn aıtty.
Buǵan deıin baspasóz hatshysy Elbasynyń densaýlyǵy týraly aıtty. Oqshaýlaný talabyna baılanysty N.Nazarbaev qashyqtan jumys istep jatyr.
Adamdardyń birligi, olardyń izgi jáne shyn kóńilden bildirgen tilekteri Tuńǵysh Prezıdentke kúsh beretinin jetkizdi.
Aıta keteıik, Elbasynyń baspasóz hatshysy Qazaqstannyń Tuńǵysh Prezıdenti Nursultan Nazarbaevtyń COVID-19-ǵa tapsyrǵan synamasy oń nátıje kórsetkenin habarlaǵan edi.
«Aı bastalǵaly Nursultan Nazarbaevtyń jumys kestesi óte tyǵyz boldy. Elbasy ekijaqty kelissózder júrgizip, resmı tulǵalardy qabyldady. Oǵan qosa, Tuńǵysh Prezıdent otandyq jáne sheteldik BAQ ókilderine suhbat berdi. Jalpy alǵanda televızııalyq túsirim úshin 40 adam jumys istedi, onyń ishinde shet eldiń azamattary da bar. Nursultan Nazarbaevtyń jaǵdaıyn medıtsına qyzmetkerleri baqylap otyr. Alańdaýǵa negiz joq. Elbasy zamanaýı kommýnıkatsııa arnalaryn paıdalanyp qashyqtan jumys istep jatyr», - degen bolatyn ol.
