Elbasy: Ózgerýge kónbegender tarıhtyń shańyna kómilip qala beredi
ASTANA. QazAqparat - Jańa jaǵdaıda jańǵyrýǵa degen ishki umtylys - damýymyzdyń eń basty qaǵıdasy. Búgin «Egemen Qazaqstan» respýblıkalyq gazetinde shyqqan QR Prezıdenti Nursultan Nazarbaevtyń «Bolashaqqa baǵdar: rýhanı jańǵyrý» atty maqalasynda osylaı delingen, dep habarlaıdy QazAqparat.
«Memleket pen ult quryshtan quıylyp, qatyp qalǵan dúnıe emes, únemi damyp otyratyn tiri aǵza ispetti. Ol ómir súrý úshin zaman aǵymyna sanaly túrde beıimdelýge qabiletti bolýy kerek. Jańa jahandyq úrdister eshkimnen suramaı, esik qaqpastan birden tórge ozdy. Sondyqtan, zamanǵa sáıkes jańǵyrý mindeti barlyq memleketterdiń aldynda tur. Synaptaı syrǵyǵan ýaqyt eshkimdi kútip turmaıdy, jańǵyrý da tarıhtyń ózi sııaqty jalǵasa beretin protsess. Eki dáýir túıisken óliara shaqta Qazaqstanǵa túbegeıli jańǵyrý jáne jańa ıdeıalar arqyly bolashaǵyn baıandy ete túsýdiń teńdessiz tarıhı múmkindigi berilip otyr», - dedi maqalasyn qorytyndalaı kele Elbasy.
Osyǵan oraı, Nursultan Nazarbaev barsha qazaqstandyqtardy, ásirese, jas urpaq jańǵyrý jónindegi osynaý usynystardyń mańyzyn tereń túsinedi degen senimin bildiredi. «Jańa jaǵdaıda jańǵyrýǵa degen ishki umtylys bizdiń damýymyzdyń eń basty qaǵıdasy. Ómir súrý úshin ózgere bilý kerek. Oǵan kónbegender tarıhtyń shańyna kómilip qala beredi», - deıdi Memleket basshysy.
