Elbasy osyndaı qıyn kezeńde birinshi bolyp qoǵamǵa úlgi kórsetti - Altaı Kólginov
«Táýelsiz elimiz ben bas qalamyzdyń negizin qalaýshy, Elbasy Nursultan Ábishuly Nazarbaev qazaqstandyqtarǵa Úndeý joldady. Budan da qıyn kezeńde, tipti aýyr jaǵdaıda el tizginin qolyna alǵan Tuńǵysh Prezıdentimiz halqymyzdyń myǵym birligimen dúnıedegi birneshe daǵdarystan aman alyp shyǵyp, memleketimizdi órkenıetti elder qataryna qosqanyn eshqashan esten shyǵarǵan emespiz. Ekonomıkalyq, áleýmettik basqa da túrli daǵdarysty halyqpen birge júrip eńsergen Elbasymyzdyń tájirıbesi – bárimiz úshin sabaq. Úndeýde eńbek oryndaryn saqtap, azamattardy jumystan shyǵarmaý týraly da aıtyldy Bul degenimiz – jaǵdaıdy tereń túsine otyryp tanytqan úlken janashyrlyq», - dedi qala ákimi óziniń áleýmettik jelidegi paraqshasynda .
Altaı Kólginov Memleket basshysy Qasym-Jomart Toqaevtyń tapsyrmasyna sáıkes, qaladaǵy mekeme basshylarymen kelise otyryp, jumys oryndaryn saqtap, qashyqtan jumys isteýdi uıymdastyrǵanyn jetkizdi.
«Álemdi sharpyǵan indet ókinishke qaraı, bizdiń elimizdi de aınalyp ótpedi. Úkimettiń, ákimdiktiń ózara aldyn ala ázirlegen daıyndyǵynyń jáne qazirgi kezde atqaryp jatqan jankeshti jumystarynyń arqasynda jaǵdaıdy qatań baqylaýǵa múmkindik týyp otyr. Qala karantınge jabyldy. Biraq turǵyndarǵa qajetti azyq-túlik, basqa da turmysqa qajetti taýarlardyń úzdiksiz kirýine kedergi joq. Sondyqtan azyq-túlik dúkenderinde únemi tamaq bolady. Qanaǵat qaryn toıdyrady deıdi. Ózge elderdegideı japatarmaǵaı azyq taýarlaryn kóshirip alyp ketýge de esh negiz joq. Elbasy osyndaı qıyn kezeńde birinshi bolyp qoǵamǵa úlgi kórsetti. Tuńǵysh Prezıdent Qory esebinen 200 mıllıon, «Nur Otan» partııasynyń jobalary aıasynda 150 mıllıon teńge bóldi. Túsken qarajat karantın jarııalanǵan qalalardaǵy áleýmettik jaǵdaıy tómen azamattarǵa ataýly kómek kórsetýge jumsalyp jatyr. Qazirdiń ózinde ulttyq bıznes ókilderiniń el-jurtqa kórsetip jatqan kómegi úshin rızashylyǵyn bildirgen Úndeý ıesi: «mundaı márttik jalǵasyn taýyp, oǵan qosylatyn bıznes ókilderiniń sany kóbeıe túsedi degen úmittemin. Elordalyq bıznes ókilderi de qoldarynan kelgenshe azamattarǵa kómek qolyn sozyp, qıyn sátte birlik tanytyp jatyr», - dedi», - dedi ol.
Sonymen qatar, ákim úndeýde usynylǵandaı qalada arnaıy qor ashylǵanyn jetkizdi.
«Oǵan túsken qarjy muqtaj azamattarǵa, áleýmettik osal toptarǵa beriledi. Sonymen qatar koronavırýs ınfektsııasyn juqtyrǵan azamattardy kúni-túni emdep úı betin kórmeı júrgen medıtsınalyq qyzmetkerlerge ústemaqy retinde beriledi. Memlekettiń jyldar boıy jınaǵan qory jetkilikti. Daǵdarystar kezinde bıznesti saýyqtyrý úshin árdaıym qoldaý jasap keledi. Qazir de kóp kómek kórsetilip jatyr. Alaıda osyndaı, bıznestiń áleýmettik jaýapkershiligi synalatyn sátte halyqqa kómek kórsetip jatqan kompanııa basshylaryna, mekemelerge, jekelegen azamattarǵa rahmetimdi aıtamyn. Qazir bárimizdiń maqsat-múddemiz bireý ǵana. Ol – tutas el ekenimizdi tanytyp, tosynnan kelgen synaq kezinde judyryqtaı jumylýymyz. Jáne ol bizdiń qolymyzdan keledi. Birligimiz ben sabyrymyz synalǵan talaı qıynshylyqty birge jeńgenbiz. Oǵan kári tarıh qanshama ret kýá bolǵan. Ol úshin shyn muqtaj azamattarǵa osyndaıda qoldaý qajet. Sondyqtan, arnaıy qor ashylǵanyn habarlap, is basynda júrgen qalamyzdyń kásipkerlerin osy synaqta bir jeńnen qol, bir jaǵadan bas shyǵaryp qoldaýǵa shaqyramyn. Biz birgemiz!»- dep tolyqtyrdy A. Kólginov.
Eske salsaq, Qazaqstannyń Tuńǵysh Prezıdenti Nursultan Nazarbaev Qazaqstan halqyna úndeý joldaǵan bolatyn.