Elbasy Ornyqty damý úshin jahandyq yqpaldastyq pen áleýetti arttyrý forýmynyń qatysýshylaryna úndeý joldady
Elbasy N. Nazarbaevtyń joldaýyn QR Premer-Mınıstriniń orynbasary – Syrtqy ister mınıstri Muhtar Tileýberdi oqyp berdi.
Qazaqstannyń Tuńǵysh Prezıdenti óziniń joldaýynda COVID-19 indetiniń búkil álemge jyldam taralýy, onyń buryn-sońdy bolmaǵan qaıǵyly saldary men álemdik ekonomıkaǵa joıqyn áseri bizdiń elderimizdiń qanshalyqty ózara táýeldi ekenin jáne planetamyzdyń qanshalyqty názik ekenin aıqyn kórsetkenin atap ótti.
Osyǵan baılanysty ol bul jahandyq qaýip-qaterdi búkil halyqaralyq qoǵamdastyqtyń kúsh-jigerin ár túrli qyzmet salalarynda biriktirý arqyly ǵana jeńýge bolatynyn basa aıtty. «Osyndaı birlesken tásildi qajet etetin basym sharalardyń biri - COVID-19-ǵa qarsy vaktsınany teń jáne ádil taratý», - dedi Elbasy.
Nursultan Nazarbaev aǵymdaǵy onjyldyq «BUU-ǵa múshe barlyq elder úshin ortaq jahandyq kompas» bolyp tabylatyn 2030 jylǵa deıingi Ornyqty damý maqsattaryn (ODM) júzege asyrý úshin óte mańyzdy ekenin eske saldy. Alaıda, osy maqsattarǵa jetý úshin memleketterge qosymsha 700 mıllıard AQSh dollarynan astam qarajat qajet bolady. Qajetti resýrstardy tabý úshin Elbasy Qazaqstannyń barlyq elderdiń áskerı shyǵyndaryn 1% azaıtý jáne olardyń damý maqsattaryna baǵyttaý týraly bastamasyna qaıta oralýdy usyndy. «Men bul ıdeıany 1992 jyldan beri BUU minberinen birneshe ret kóterdim jáne búgingi kúni bul erekshe ózekti bolyp tabylady», - dedi ol.
Qazaqstannyń Tuńǵysh Prezıdenti sonymen qatar 2021 jylǵy is-sharanyń taqyryby «Qaýipsizdik úshin beıbitshilik, órkendeý jáne seriktestik» Qazaqstannyń strategııalyq ustanymdaryna tolyq sáıkes keletinin atap ótti. Belsendi, beıbit ári jaýapty syrtqy saıasat arqyly Qazaqstan jahandyq antııadrolyq qozǵalysqa kóshbasshylyq etý, qaqtyǵystardy sheshý jáne bizdiń aımaqta jáne odan tys óńirlerde damýǵa kómek kórsetý arqyly halyqaralyq qaýipsizdik pen turaqtylyqqa yqpal etýde. Elbasynyń bastamasymen Azııadaǵy ózara is-qımyl jáne senim sharalary jónindegi keńes jáne Álemdik jáne dástúrli dinder kóshbasshylarynyń sezi iske qosyldy.
Memleketimizdiń ornyqty damý salasyndaǵy ilgerileýine toqtala otyryp, Nursultan Nazarbaev Qazaqstan áleýmettik-ekonomıkalyq damýdyń kóptegen kórsetkishteri boıynsha aıtarlyqtaı tabystarǵa qol jetkizgenin jáne 2050 jylǵa qaraı álemdegi eń damyǵan 30 eldiń qataryna kirý maqsatyna birtindep ilgerilep jatqanyn atap ótti. Elbasy halyqtyń ál-aýqaty men ómir súrý sapasyn jaqsartýdyń aldaǵy josparlary týraly, onyń ishinde densaýlyq saqtaý men bilimge ınvestıtsııalardy aldaǵy 5 jylda JІÓ-niń 10% -na deıin ulǵaıtý jáne ekonomıkany ártaraptandyrý týraly baıandady.
Sonymen qatar, is-sharaǵa basty spıkerler retinde Kolýmbııa Prezıdenti Ivan Dýke Markes, BUU Bas hatshysynyń birinshi orynbasary Amına Mohammed jáne Dúnıejúzilik banktiń 12-prezıdenti Djım En Kım qatysty.
Aıta keteıik, Ornyqty damý úshin jahandyq yqpaldastyq pen áleýetti arttyrý forýmy BUU-nyń 8-shi Bas hatshysy Pan Gı Mýnnyń bastamasymen 2018 jyldan beri ótkizilip keledi. Pandemııaǵa baılanysty bıyl forým gıbrıdtik rejımde ótti.
Forýmnyń teń tóraǵalary Avstrııanyń burynǵy prezıdenti Haınts Fısher men Ense ýnıversıtetiniń prezıdenti So Song Hvan Elbasynyń jahandyq beıbitshilik pen seriktestikti saqtaýǵa qosqan mańyzdy úlesin atap ótti. Іs- shara Ense ýnıversıtetiniń bazasynda ótkiziledi. Osyǵa deıin Qazaqstannyń tuńǵysh Prezıdentine osy bedeldi ýnıversıtettiń qurmetti doktory ataǵy berilgen bolatyn.
