Elbasy OQO ákimine shaǵyn jáne orta bıznesti odan ári damytýdy tapsyrdy
ASTANA. QazAqparat - Qazaqstan Respýblıkasynyń Prezıdenti Nursultan Nazarbaev Ońtústik Qazaqstan oblysynyń ákimi Janseıit Túımebaevty qabyldady, dep habarlaıdy Aqordanyń baspasóz qyzmeti.
Kezdesý barysynda J.Túımebaev Memleket basshysyna oblystyń bıylǵy perspektıvalary, sondaı-aq óńirdiń 2021 jylǵa deıingi áleýmettik-ekonomıkalyq damý jospary týraly baıandady.
Elbasy óńirdiń salyq túsimderi kórsetkishiniń tómen ekenin, óńirdiń respýblıka boıynsha meılinshe dotatsııaly bolyp otyrǵanyn atap ótti.
Sondaı-aq, Nursultan Nazarbaev eńbek naryǵyn retteý salasyndaǵy jumyssyzdyq máselelerine nazar aýdardy.
- Ózin-ózi jumyspen qamtyǵan azamattardyń úlesi joǵary. Ońtústik Qazaqstan úshin jumyssyzdyq pen halyqtyń kóshi-qon máselesi árqashan ózekti bolyp qala bermek. Bul máselelerdi sheshý úshin shaǵyn jáne orta bıznesti odan ári damytý qajet, - dedi Qazaqstan Prezıdenti.
Budan bólek, Memleket basshysy Shymkenttiń taıaý keleshekte turǵyndarynyń sany 1 mıllıon adamnan asatyn qalaǵa aınalatynyn atap ótti.
Oblys ákimi Elbasyǵa «Qazaqstannyń úshinshi jańǵyrýy: jahandyq básekege qabilettilik» atty joldaýda belgilengen maqsattar men mindetterdi aımaq turǵyndary jan-jaqty qoldap otyrǵany týraly málimdedi.
Sońynda Nursultan Nazarbaev oblys ónerkásibin, aýyl sharýashylyǵy men mal sharýashylyǵy salalaryn damytý, ınvestıtsııalyq tartymdylyǵyn arttyrý jóninde mindetterdi oryndaýǵa baǵyttalǵan birqatar naqty tapsyrma berdi.
