Elbasy OA elderi jaıly: Aımaq qaýipsizdigin birlese saqtaýymyz qajet

ASTANA. QazAqparat - Qazaqstan Prezıdenti Nursultan Nazarbaev Ortalyq Azııa elderiniń ıntegratsııasy týrasynda óziniń oıymen bólisti, dep habarlaıdy «QazAqparat» HAA tilshisi.

Prezıdent Astana klýby qatysýshysynyń saýalyna jaýap bere kele, Ortalyq Azııa odaǵyn qurý týraly bastamany eske aldy. Ol kezde ekonomıka pozıtsııalarynyń ártúrli bolýy odaqty qurýǵa múmkindik bermegen.

«Meniń oıymsha, arada shırek ǵasyr ótkennen keıin bizge, ıaǵnı tarıhy men dini, mádenıeti men mentalıteti bir memleketterge birge bolýdy, aımaqtyń qaýipsizdigin birge saqtaýdy Qudaıdyń ózi buıyrǵan sekildi», - dedi Nursultan Nazarbaev.

Memleket basshysy Ózbekstanmen qarym-qatynastyń damýyn da tilge tıek etti.

«Men Ózbekstannyń ekonomıkasynda túbegeıli ózgerister bolyp jatqanyn baıqap otyrmyn. Bar-joǵy bir jyldyń ishinde bizdiń elderdiń shekaralary ashylyp, saýda-sattyq 30 paıyzǵa artty. Birlesken kásiporyndar ashylyp, adamdar bir-birimen aralasa bastady. Mádenı baılanys ornady. Men bul baǵyttaǵy jumysqa qýana otyryp qoldaý bildiremin», - dedi Elbasy.

Prezıdent atap ótkendeı, Ortalyq Azııa elderi bireýge qarsy turý úshin emes, halyqtardyń gúldene túsýi úshin birigýi kerek.

«Men osylaı bolar dep úmittenemin. Bizdi Qudaıdyń ózi kórshi qylǵan», - dedi ol.