Elbasy Nurjuman Yqtymbaevty 70 jyldyq mereıtoıymen quttyqtady
ALMATY. 16 mamyr. QazAqparat /Erlik Erjanuly/ - «Siz elimizdiń kıno óneri salasynda ózindik ornyńyz bar tulǵasyz». QR Prezıdenti Nursultan Nazarbaevtyń Almatyda Qazaqstannyń halyq ártisi,
KSRO Memlekettik syılyǵynyń ıegeri Nurjuman Yqtymbaevtyń 70 jyldyq mereıtoıyna arnalǵan quttyqtaý hatynda osylaı aıtylǵan.
Ony «Qazaqtyń Nurjumany» dep atalatyn shyǵarmashylyq keshte mereıtoı ıesine Qazaqtyń Muhtar Áýezov atyndaǵy memlekettik akademııalyq drama teatryna jınalǵan barsha ónersúıer qaýymnyń aldynda Sháken Aımanov atyndaǵy «Qazaqfılm» kınostýdııasy» AQ-nyń prezıdenti Ermek Amanshaev oqyp berdi. Memleket basshysy quttyqtaýynda Nurjuman Baıjumanulynyń Qazaqstanda sońǵy jarty ǵasyrǵa jýyq ýaqyttyń aýqymynda túsirilgen fılmderdiń kópshiligine qatysyp, san qyrly rólderdi aıshyqty somdap, óz qoltańbasyn qaldyrǵanyn erekshe atap ótedi. "Eńbeksúıgishtigińiz ben izdengishtigińizdi, keıipkerdiń jan dúnıesin ashýdaǵy kásibı sheberligińizdi kıno ónerin qadirleıtin qaýym joǵary baǵalaıdy. Birqatar elderdiń kınostýdııalary týyndylaryna qatysýyńyz sizdiń ónerińizge degen suranystyń joǵary ekenin ańǵartatyn súıinishti jáıt. Mol tájirıbeńiz bola turyp óner maıtalmany retinde akterlik biliktiligińizdi osy kezge deıin udaıy shyńdap otyrýyńyz da jastarymyzǵa jaqsy úlgi dep bilemin", - delingen.
