Elbasy Nursultan Nazarbaevtyń jeke muraǵaty Astanadaǵy kórmege qoıyldy
ASTANA. 28 qarasha. QazAqparat - QR Tuńǵysh Prezıdenti murajaıynda "Tarıhı tańdaý" atty Elbasy Nursultan Nazarbaevtyń jeke muraǵat qorynan alynǵan eksponattar kórmesi ashyldy.
Kórme bıyl alǵash ret atap ótiletin QR Tuńǵysh Prezıdenti kúnine arnalyp otyr. 1991 jyly dál osy 1 jeltoqsan kúni N.Á.Nazarbaev Qazaqstan tarıhyndaǵy alǵashqy jalpyhalyqtyq saılaýda Qazaq KSR Prezıdenti bolyp saılandy. On kúnnen soń bolǵan Tuńǵysh Prezıdenttiń ulyqtaý rásiminde, "Qazaq Keńestik Sotsıalısttik Respýblıkasynyń ataýyn ózgertý týraly" Zańǵa sáıkes bizdiń elimiz Qazaqstan Respýblıkasy dep atala bastady.
Kórmege 1991 jyly alǵashqy jalpyhalyqtyq prezıdent saılaýynan keıingi tarıhı kezeńdi qamtıtyn jádigerler jáne materıaldar qoıylǵan. Atap aıtqanda, eki zalda Nursultan Ábishuly Nazarbaevtyń jeke muraǵatynan biregeı materıaldar jınaǵy: qoljazbalar, jumys bloknottary, kúndelikterdegi jazbalar, sóılegen sózderiniń tezısteri, resmı qujattar, saılaý naýqany kezindegi jáne saılaýdan keıingi ýaqyttaǵy oqıǵalar jaıly foto jáne beıne materıaldar usynylǵan. Kórmeni Elbasynyń birqatar jeke zattary men Memleket Basshysyna berilgen kádesyılar arasynan eń tańdaýly jádigerler tolyqtyrady. Ekspozıtsııa QR Tuńǵysh Prezıdentiniń táýelsiz, demokratııalyq memleketti qurý, memlekettik rámizderdi, Konstıtýtsııany qabyldaý, ulttyq valıýtany engizý, astanany aýystyrý jáne el taǵdyry úshin jasalǵan basqa da mańyzdy sheshimderdi qabyldaýdaǵy tarıhı rólin ashyp kórsetedi.
Prezıdent Keńsesi bastyǵynyń orynbasary Baqytjan Temirbolattyń aıtýynsha, Qazaqstannyń Prezıdenttik ınstıtýty keńestik júıeni qıratqan asa qýatty daǵdarys kezinde dúnıege keldi jáne ol óziniń ǵumyrynda qabilettiligi men aýqattylyǵyn kórsetti.
«Ondaǵy úlken róldi Prezıdent, Táýelsiz Qazaqstannyń negizin qalaýshy, Ult Kóshbasshysy Nursultan Nazarbaev oınady. Qazaqstandyqtar sol kezde jarqyn bolashaq týraly aıtqan Elbasynyń sózin búgingi kórmede kórip, tarıhı oqıǵalardy óz kózderimen kóre alady», - dedi ol kórmeniń ashylýynda.
