Elbasy Nursultan Nazarbaev sáýirdiń 3-inen 4-ine aýǵan túni Respýblıkalyq saılaýaldy qoǵamdyq shtabta boldy.

Nursultan Nazarbaev shtabtyń múshelerimen, partııa boıynsha seriktesterimen, senimdi ókilderimen, respýblıkalyq jurtshylyq ókilderimen, volonterlarmen, jastarmen kezdesti.

Ekzıt-pýldyń nátıjeleri boıynsha daýys berýdiń aldyn ala qorytyndylary jarııalanǵan jańalyqtar jarııalanymyn qarap shyqqannan keıin, Memleket basshysy jınalǵandar aldynda sóz sóıledi.

- Qymbatty qazaqstandyqtar, otandastarym! Qazir ǵana bizdiń Táýelsizdigimizdiń 19 jyldyq tarıhyndaǵy búgingi tarıhı saılaýdyń aldyn- ala qorytyndylary belgili bola bastady. Tarıhı bolatyny - biz kúlli álemge bizdiń qoǵamnyń demokratııalyǵyn, bizdiń jetistikterimizdi taǵy da dáleldedik. Osy kúnderde barsha álemniń nazary derlik Qazaqstanǵa aýdy. Bul saılaý ashyq, ádil ótti. Quqyq qorǵaý organdary zańnyń saqtalýyn qadaǵalady. Prezıdenttikke kandıdattardyń barlyǵyna teń quqyq berildi, buqaralyq aqparat quraldaryna qoljetimdilikke ıe boldy, barlyq oblystarda, aýdandarda, qalalarda, aýyldarda óz baǵdarlamalaryn, óz ıdeıalaryn jetkizýge múmkindikter jasaldy. Biz ashyq qoǵambyz. Sondyqtan bizdiń saılaýdy baqylaý úshin 1059 sheteldik baıqaýshylar, 200 sheteldik jýrnalıster keldi. Olarǵa daýys berý úderisine kedergisiz qatysýǵa, saılaý barysyn baqylaýǵa múmkindikter berildi. Qazir júrgizilgen ekzıt-pýl Qazaqstan halqynyń reformalar jasaýǵa, qoǵamdy jańǵyrtýǵa, árbir qazaqstandyqtyń, árbir otbasynyń, árdir adamnyń, qazaqstandyqtardyń ál-aýqatyn arttyrýǵa baǵyttalǵan meniń baǵytymdy taǵy da qoldaǵanyn kórsetti. Osyndaı senimi úshin barsha qazaqstandyqtarǵa, qoǵamdyq shtabqa, osynda qurylǵan 2020-Demokratııalyq odaqqa rızashylyǵymdy bildirgim keledi. Olar barlyq oblys boıynsha jumys istedi. Shtabtyń múshelerine, osynaý bizdiń Táýelsizdigimizdiń 20 jyly ishinde menimen birge júrgen dostaryma, ózimniń qymbatty seriktesterime alǵysymdy aıtamyn. Saılaýda saılaý kúni jeńiske jetpeıtini, odan kóp buryn - isimen jeńiske jetetini belgili. Endeshe, bizdiń osy 20 jyl ishinde atqarǵan isimiz tekke ketken joq. Bul bizge berilgen baǵa. Biz bul emtıhannan súrinbeı óttik. Men barlyq 29 myń senimdi ókilderime alǵysymdy bildiremin, olar - 29 myń. Men 88 myń volonterǵa alǵysymdy aıtamyn. Ásirese, úlken belsendilik kórsetken, meniń baǵytymdy, jeke meni qoldaǵan bizdiń jastarymyzǵa degen meniń alǵysym erekshe. Sol sebepti men kandıdat retinde jeńiske jettim, árıne, kúlli elimiz, kúlli Qazaqstan jeńdi dep sanaımyn. Sondyqtan sizder ekonomıkalyq, saıası jáne áleýmettik reformalar baǵytyn jalǵastyrý úshin maǵan kart-blansh berdińizder. Biz ony odan ári jalǵastyratyn bolamyz. Men búgin saılaýǵa kelip, bizdiń halqymyzdyń toptasqanyn kórsetken barlyǵyńyzǵa rızamyn. Bizdiń barlyq jetistikterimiz bizdiń birligimizdiń, kóp ultty Qazaqstandaǵy bizdiń dostyǵymyzdyń, árbir adamnyń quqyǵy men erkindigin qurmetteýdiń nátıjesinde múmkin boldy. Buqaralaq aqparat quraldary da, barlyq óńirler de barlyq kandıdattarǵa qolushyn sozdy. Men óz ıdeıalaryn bildirgen ózge kandıdattarǵa da rızamyn. Olar bildirgen jaqsy usynystardy eskerýimiz kerek. Men barsha qazaqstandyqtarǵa, meniń barlyq seriktesterime, menimen birge eńbek etken dostaryma taǵy da alǵysymdy aıtamyn, aldymyzǵa qoıylǵan barlyq mindetterdi júzege asyrý úshin barlyǵyna myqty densaýlyq tileımin. Men ár úıge, elimizdiń árbir azamatyna baqyt pen qut-bereke tileımin, - dedi Memleket basshysy.

Odan keıin Nursultan Nazarbaev on-laın rejıminde óńirlik shtabtarmen áńgime ótkizdi.

Qazaqstannyń áleýmettanýshylar men saıasattanýshylar qoǵamdastyǵy júrgizgen ekzıt-pýl ádisimen áleýmettik saýlnamanyń nátıjeleri boıynsha, 3 sáýirde Qazaqstannyń barlyq óńirinde - Qazaqstannyń 14 oblysynda jáne Astana men Almaty qalalarynda is basyndaǵy Memleket basshysy Nursultan Nazarbaev eń kóp daýysqa ıe boldy. Oǵan saýalnamaǵa jaýap bergenderdiń 94,82 paıyzy daýys bergen. Qazaqstan boıynsha ortasha eseppen saılaýǵa qatysqandar - 84,9 paıyzdy quraǵan. Ekzıt-pýl Qazaqstan Respýblıkasynyń saılaý zańnamasyna sáıkes qatań júrgiziledi, saılaý komıssııasynyń jumysyna nuqsan keltirmeıdi jáne saılaýshylardyń óz erkin bildirýine qandaı da bir zııanyn tıgizbeıdi.