Elbasy Nursultan Nazarbaev Kıevte ótetin ıadrolyq energııany qaýipsiz jáne ınnovatsııalyq maqsatta paıdalaný jónindegi Sammıtke qatysatyn boldy
ASTANA. 18 sáýir. QazAqparat /Aıdar Ospanalıev/ - 19 sáýirde Elbasy Nursultan Nazarbaev Kıevte ótetin ıAdrolyq energııany qaýipsiz jáne ınnovatsııalyq maqsatta paıdalaný jónindegi Sammıtke qatysady. Bul týraly búgin jýrnalıstermen bolǵan brıfıngte Syrtqy ister mınıstrliginiń resmı ókili Asqar Abdrahmanov málim etti.
Onyń sózine qaraǵanda, osy ýaqytta ózderiniń atalmysh Sammıttke qatysatyndyqtaryn Eýropa men Azııanyń birqatar memleketteriniń basshylary men úkimet basshylary jáne BUU-nyń Bas hatshysy, MAGATE, Eýropalyq komıssııa, Eýropalyq damý jáne qaıta qurý banki sııaqty ózge de birqatar halyqaralyq uıymdardyń jetekshileri rastaǵan.
«Aldaǵy Sammıtke Qazaqstan basshysynyń qatysýy elimizdiń qarýsyzdaný men ony taratpaý isine aıtarlyqtaı úles qosyp otyrǵandyǵyn kórsetedi. Sonymen qatar bul halyqaralyq ıadrolyq qaýipsizdikti qamtamasyz etý men atom energııasyn tek beıbit maqsatta ǵana paıdalaný jónindegi prıntsıpti pozıtsııasynyń kórinisi»,-dedi resmı ókil.
Onyń aıtýynsha, Sammıttiń nátıejeleri boıynsha arnaıy Deklaratsııa qabyldaý kózdelip otyr. Onda ıadrolyq qarýdy taratpaý jónindegi kelisimniń taratpaý jónindegi rejımin nyǵaıtý talaptaryn qamtamasyz etýdiń asa qajettiligi aıtylǵan. Sondaı-aq atalmysh qujatta memleketterdiń ıadrolyq energııany beıbit maqsatta paıdalaný quqyǵy, ıadrolyq qaýipsizdikti nyǵaıtyp, memleketterdi ıadrolyq energetıka salasyndaǵy ınnovatsııalyq protseske tartý máselesi qarastyrylǵan.
