Elbasy «Nokıa» kompanııasynyń ınnovatsııalyq tehnologııalarymen tanysty

HELЬSINKI. QazAqparat - Qazaqstan Prezıdenti Nursultan Nazarbaev Fınlıandııaǵa resmı sapary aıasynda «Nokıa» kompanııasynyń tanystyrylym ortalyǵynda bolyp, jańa ınnovatsııalyq tehnologııalardy kórdi. Kompanııanyń sońǵy jetistikterimen Elbasyn «Nokıanyń» bas dırektory Radjıv Sýrı tanystyrdy, dep habarlaıdy QazAqparattyń arnaýly tilshisi Helsınkıden.

«Biz tsıfrlyq tehnologııalarda álemniń jetekshi elderiniń biri sanalatyn Qazaqstanmen yntymaqtastyqty jandandyra túskimiz keledi. Besinshi býynnyń tehnologııalaryn logıstıkada, aqyldy qalalarda, tehnologııalar jelisinde qalaı paıdalaný qajettigin jaqsy bilemiz.  Besinshi býyn tehnologııasy radıospektrdiń tómen, ortańǵy jáne joǵary salasynda bóliniske túsýi tıis. Olardyń barlyǵy da tehnologııalardyń tabysty paıdalanylýy úshin bir mezette ornalastyrylýy qajet», - dedi ol.

Al «Qazaqtelekom» AQ-nyń basqarma tóraǵasy Qýanyshbek Esekeev osydan jarty jyl buryn «Nokıa» kompanııasymen Qazaqstan aýmaǵynda 5G jelisin synaqtan ótkizý týraly kelisimge qol qoıylǵanyn atap ótti.

«Іs júzine kelgende mundaı synaqtan ótkizý jumysyn qolǵa alýdy bastaǵan eń birinshi elmiz. Shanhaıda ótken uıaly baılanys kongresinde bul jaıynda ýaǵdalastyq. Qazir eki núkteni synaqtan ótkizýdemiz. Onyń biri Astana qalasy men Aqmola oblysynda, ekinshisi Almaty oblysynda ornalasqan», - dep atap ótti Qýanyshbek Esekeev.

Esterińizge sala ketsek, búgin Elbasy Fınlıandııa Prezıdenti Saýlı Nıınıstemen shaǵyn jáne keńeıtilgen quramda kezdesý ótkizdi. 

Kezdesýden keıingi birlesken málimdeme barysynda Nursultan Nazarbaev Qazaqstan-Fınlıandııa bıznesmenderi 600 mln dollardyń kelisimshartyn jasasqanyn, qazaq pen fınniń tarıhy da, taǵdyry da uqsas ekendigin, elimizdiń kólik áleýeti zor ekendigin basa aıtty. 

Sapar aıasynda Memleket basshysy keshe fın bıznes kapıtandarymen júzdesti.  

Kezdesý barysynda Memleket basshysy Fınlıandııadan Qazaqstan arqyly Qytaıǵa jańa temir jol baǵdary ashylatyndyǵyn aıtty jáne fın kompanııalaryn elimizdegi agroónerkásiptik keshendegi jobalardy júzege asyrýǵa shaqyrdy.

Sondaı-aq fın kompanııalary úshin Qazaqstannyń týrızm salasy da tartymdy ekenin, ІT-kompanııalaryna da qolaıly jaǵdaı jasalatyndyǵyn atap ótti.