Elbasy Nazarbaev Ýnıversıtetiniń úzdik túlekterine dıplom tapsyrdy
ASTANA. QazAqparat - Búgin Nazarbaev Ýnıversıteti túlekteriniń ekinshi saltanatty oqý bitirý rásiminde Elbasy Nursultan Nazarbaev úzdik stýdentterge dıplomdardy óz qolymen tabys etti.
«Ótken jyly men bizdiń ýnıversıtettiń birinshi túlekterine dıplom tabystaǵan edim. Búginde sol túlekterdiń eńbekteri men nátıjelerin maqtan tutamyz. Olar óz isteriniń naǵyz kásibı sheberleri retinde qalyptasyp, jetekshi qazaqstandyq jáne sheteldik kompanııalarda jumys isteýde, kópshiligi ózderiniń bilimin sheteldik ǵylymı-zertteý ortalyqtarynda jalǵastyrýda», - dep atap ótti Elbasy.
QR Prezıdenti bul ýnıversıtettiń tek qana Qazaqstan emes, sonymen birge kóptegen el úshin bıohımııa, ıadrolyq ınjenerııa, robot tehnıkasy, mehatronıka syndy salalarda bilikti mamandar daıyndaıtyndyǵyn atap ótti.
Aıta keterligi, bıyl ýnıversıtetti 622 stýdent bitirip otyr. Olardyń 444-i bakalavrıat baǵdarlamasy boıynsha, al 178-i magıstratýra baǵdarlamasy boıynsha oqýlaryn aıaqtady.
