Elbasy Nazarbaev Ýnıversıteti túlekterine aqylyn aıtty
"Barlyqtaryńyz osy ómirde úlken jetistikterge jetýdi qalaısyzdar. Menińshe, sender óz maqsattaryńa jetesińder. Maǵan táýelsiz Qazaqstandy qurý mindeti buıyrdy. Egemen elimizdi qurdyq, kartaǵa engizdik. Qazaqty dúnıejúzine tanytý jumysy maǵan buıyrdy. Memleketti qurý, ekonomıkasyn kóterý, onyń ústine qazaqtyń tarıxynda tuńǵysh ret óz sheshimimen óz Astanasyn turǵyzýǵa atsalystyq. Osynyń bári bizdiń qolymyzdan keldi. Bıyl 20 jyldyǵyn atap óteıin dep otyrmyz. Mynandaı ýnıversıtet salǵyzdyq, túlekterdi daıyndadyq. Eń bolmasa, maǵan uqsap birdeńe isteńder", - dedi N.Nazarbaev saltanatty sharada.
Osy oraıda Memleket basshysy óziniń ómirlik tájirıbesimen bólise otyryp jastardyń qazirgi bastamalardy tabysty iske asyratynyna senim bildirdi. «Qazirgi jastar - jańarǵan Qazaqstannyń ókilderi, jańa formatsııanyń urpaǵy. Búgingi bastamalardy sender iske asyrasyńdar. Senderdiń aqyl-oılaryń, kreatıv pen energııalaryń - tabysty bolashaǵymyzdyń kepili, Táýelsizdigimizdiń kepili. Senderge biraz qıyndyqtardan ótýge týra keledi. Birde jeńesińder, birde jeńilesińder. Adamǵa birde senesińder, birde kóńilderiń qalady. Onyń bári - ómir. Men osynyń bárin kórgennen keıin aıtyp otyrmyn. Ózderińe senińder, týǵan jerlerińe, oı-ıdeıalaryńa senińder. Sodan qýat alasyńdar», - dep atap kórsetti N.Nazarbaev.
Aıta keteıik, búgin Nursultan Nazarbaev barsha ýnıversıtet túlekterin quttyqtady. Prezıdenttiń aıtýynsha, ótken jyly Nazarbaev ýnıversıteti álemdik joǵary oqý oryndary alıansynyń quryltaıshysy atandy. Osylaısha, Sıngapýr, Japonııa, Qytaı, Úndistan, Qytaı, Ońtústik Koreıa sııaqty elderdiń eń úzdik ýnıversıtetteri qatarynan kórindi.
"Bolashaqta elimizdiń barlyq joǵary oryndary sizderge qarap, boı túzep, bilim berý tásilin osy úlgige kóshirýi kerek. Qazir basqa da ýnıversıtetterde jastarymyz oqýyn aıaqtap jatyr. Kóp túlekter maman bolyp shyǵyp jatyr. Sondyqtan solardyń barlyǵyn shyn júrekten quttyqtaımyn", - dep atap kórsetti N.Nazarbaev.
