Elbasy N. Nazarbaevtyń «Qazaqstan bilim qoǵamy jolynda» atty ınteraktıvti dárisi ótedi

Eske sala ketsek, ınteraktıvti dáris - otandyq bilim berý salasyndaǵy jańa dástúr. Zamanaýı aqparattyq tehnologııalar arqasynda respýblıkadaǵy barsha bilim uıymdaryna Memleket basshysynyń dárisi qoljetimdi bola túspek.  Bul rette Elbasy óz dárisinde elimizdiń jańa ıntellektýaldy kapıtalyn daıarlaýdaǵy strategııalyq jospardy júzege asyrýdyń birqatar mańyzdy tustaryn atap ótetini aıtylady.

Sonymen qatar, dáristiń bastalýymen birge taǵy bir jaǵymdy jańalyq - Prezıdent jańa «Bilim» atty telearnanyń tusaýyn kesetini kútilýde. Atalmysh telearna óz jumysyn dáristi tikeleı translıatsııalaýdan bastamaq. Oqý-aǵartý salasyndaǵy birinshi telearnanyń maqsaty - bilimdi nasıhattaý, daryndy jastardy joǵary oqý oryndary men ǵylymnyń basym baǵyttaryna daıarlaý, bilim alýǵa talpynǵan árbir jetkinshekke bilimniń qoljetimdi bolýyn qamtamasyz etý.