Elbasy N.Nazarbaevtyń qatysýymen «Indýstrııalandyrý kúni» ótedi
ASTANA. 20 jeltoqsan. QazAqparat - Búgin elordadaǵy Táýelsizdik saraıynda Memleket basshysy Nursultan Nazarbaevtyń qatysýymen 3 sharanyń basyn biriktiretin «Indýstrııalandyrý kúni» ótkiziledi.
Atap aıtqanda, ÚIID MB aıasynda 2013 jyly paıdalanýǵa berilgen ınvestıtsııalyq jobalardyń ashylýyna arnalǵan jalpyulttyq telekópir, QR Prezıdentiniń «Altyn sapa» syılyǵynyń laýreattary men «Qazaqstannyń úzdik taýary» respýblıkalyq kórme-konkýrsynyń dıplomattaryn jáne QR Prezıdentiniń «Paryz» syılyǵynyń laýreattaryn saltanatty marapattaý rásimi bolady.
Telekópir barysynda Elbasy tikeleı efır arqyly qazirgi tańda jumys istep turǵan kásiporyndardyń tynys-tirshiligimen tanysyp, jańa 10 jobanyń iske qosylýyna ruqsat beredi dep kútilýde.
Jańadan qosylatyn jobalar mynalar: Shymkent-Túrkistan joly, Túrkistan qalasyn gazben qamtamasyz etý jobasy, Almaty qalasyndaǵy Qapshaǵaı kún elektr stansasy, Almaty oblysyndaǵy Jarkent krahmal-sirke zaýyty, Qaraǵandy oblysynda temir-beton buıymdaryn óndirý, Qostanaı qalasyndaǵy surypty bolat ıleý zaýyty, «Hımfarm» AQ-nyń jańa óndiristik qýattary, Pavlodar oblysyndaǵy kúıdirilgen anodtardy shyǵarý zaýyty, Mańǵystaý oblysynda jol bıtýmyn óndirý zaýyty, ShQO-daǵy fotoelektr plastınkalaryn shyǵarý zaýyty.
