Elbasy N.Nazarbaev taý shańǵysy týrızmin damytý máselesin sheshýdi júktedi
ASTANA. 12 mamyr. QazAqparat - Búgin Almatynyń áleýmettik-ekonomıkalyq damýyna arnalǵan alqaly jıyn barysynda QR Prezıdenti Nursultan Nazarbaev taý shańǵysy týrızmin damytý máselesin sheshý qajettigin atap ótti.
Elbasy eger de memleket jol salyp, kommýnıkatsııa júrgizbese, ınvestıtsııanyń aǵylýyna ıek artýǵa bolmaıtyndyǵyn basa aıtty. Osy oraıda Memleket basshysy Týrızm jáne sport mınstrligine arnaıy baǵdarlama ázirleýdi tapsyrdy.
«Sonymen qatar ishki týrızmdi damytý úshin Qapshaǵaı demalys aımaǵyn belsendi ıgerý qajet. Infraqurylymyn, jyldam kólik qatynasyn jaqsartyp, qonaq úıler, kempıng salyp, jaǵajaı aımaǵyn abattandyrý kerek», - dedi Prezıdent.
Memleket basshysynyń paıymynsha, osy maqsattarǵa jetý úshin Astana-Býrabaı avtobany sııaqty Almaty men Qapshaǵaı arasynda avtoban salý qajet. QR Prezıdenti Almaty men Almaty oblysynyń ákimderine Týrızm jáne sport mınıstrligimen, basqa da múddeli memlekettik organdarmen birlesip, týrızmdi damtý jónindegi arnaıy jumys tobyn qurýdy, halyqaralyq tájirıbeni zerdeleýdi jáne úsh aılyq merzimde naqty usynys engizýdi tapsyrdy.
