Elbasy N.Nazarbaev Seısmologııa ınstıtýtyn QR Tótenshe jaǵdaılar mınıstrliginiń qaramaǵyna berýdi usyndy

dep habarlady QR Prezıdentiniń baspasóz qyzmeti Almatynyń áleýmettik-ekonomıkalyq damýyna arnalǵan alqaly jıynnyń qorytyndysy boıynsha.

Sonymen qatar Prezıdent atalǵan ınstıtýtta jumys isteý úshin jańa mamandar tartý máselesin qarastyrýdy, ınstıtýt zerthanasyn jańa qural-jabdyqtarmen jaraqtandyrýdy usyndy.

«Biz halyqpen ádil bolýymyz kerek. Bizdiń ońtústigimiz, ásirese taý baýraıy seısmıkalyq qaýipti aımaqta ornalasqandyǵyn eshkim de teriske shyǵara almaıdy. Jer silkinisi táýekeline eń jaqyn el Japonııada bul jaǵdaıda ózin -ózi qalaı ustaý kerektigin balalarǵa mektepten-aq oqytady. Halyqqa ne isteý kerektigin túsindiredi. Bul tabıǵı apat ekendigi sózsiz, degenmen biz bunymen ǵylymı turǵyda aınalysýymyz kerek», - dep atap ótti Elbasy.

Memleket basshysy Úkimetke jáne ákimdikke qalanyń ári oblystyń seısmıkalyq kartasyn jańartý boıynsha jumystardy jedeldetý, seısmıkalyq qaýipterdi zerdeleý boıynsha is-sharalar ázirleý jáne halyqty qulaqtandyrý, ǵımarattar men bıik úılerdiń seısmıkalyq myǵymdyǵy baǵytyndaǵy jumystardy belsendirý qajettigin basa aıtty.

Sondaı-aq Prezıdent jer silkinisiniń alapat qýatty bolýyna qaramastan barlyq qutqarý qyzmetteriniń naqty jumys isteýin qamtamasyz etken Japonııanyń tájirıbesin zerdeleý qajettigin atap ótti. Buǵan deıin Almatyda halyqpen aýqymdy jumystar júrgizilip, oqý-jattyǵýlary ótkizilgen-di. Jer silkinisi barysynda adamdar jınalatyn qaýipsiz oryndar aıqyndalyp, habarlandyrý júıesi ázirlengen bolatyn.

Memleket basshysy Úkimet pen qala ákimdigine atalǵan jumystardy jańǵyrtýdy júktedi.