Elbasy N. Nazarbaev qyzmetiniń birqatar qyrlaryna ǵylymı taldaýlar jasalýy qajet - Memlekettik hatshy

ASTANA. 5 maýsym. QazAqparat - Qazaqstandyq memlekettik basqarý modeliniń mańyzdy negizin qalaýshysy - Ult kóshbasshynyń rólin aıryqsha atap kórsetkim keledi. Bul jerde Qazaqstan Basshysy qyzmetiniń birqatar qyrlaryna ǵylymı turǵyda taldaý jasaý qajet etiledi.

Búgin elordadaǵy Eýrazııa ulttyq ýnıversıtetinde Qazaqstan Respýblıkasynyń ulttyq tarıhyn zerdeleý jónindegi vedomstvoaralyq jumys tobynyń keńeıtilgen otyrysynda QR Memlekettik hatshysy Marat Tájın osylaı málimdedi.

«Birinshiden, 20 jyldan astam ýaqytta biz strategııalyq paıymymyz týraly ashyq aıta alamyz. Osy jyldar ishinde álemniń túrli óńirlerinde meteor tárizdi jylt ete qalǵan kóptegen jarqyn saıasatkerlerdi kórdik. Alaıda, eldiń damý strategııasyn ondaǵan jyldarǵa aldyn ala aıqyndap jáne oǵan boljam jasap qana qoımaı, sol jospardy iske asyra bilý - bul strategııalyq paıymdaı alatyn saıasatkerge tán qasıet. Buǵan qosa, kóshbasshynyń ózimen barlyq jaǵdaıda kelise bermeıtinin uǵyna otyryp, onyń tabysty bolashaǵyna degen jaýapkershilik júgin ózine artyp, keı jaǵdaılarda qoǵamdyq pikirge qarsy júre alatyn kúsh-jigeri jetkilikti bolýy tıis», - dedi M. Tájın.

Memlekettik hatshy mańyz bergen Elbasynyń ekinshi qyry - aıqyndylyq. Bul rette M. Tájın kóshbasshylardyń barlyǵy derlik mundaı qasıetke ıe emes ekenin, olardyń kópshiligi ony saılaýaldy naýqan kezinde beriletin jalań ýádelermen shatastyratynyn atap ótti. «Bizdiń Elbasy eshqashan áleýmettik qııal-ǵajaıyptardy ýáde etken emes, al ýáde bergen jaǵdaıda dál esepteı biledi jáne ony árdaıym iske asyrady. Úshinshiden, basqarýdyń ınnovatsııalyq stıli. Kómirsýtegine baı kóptegen elder munaı qaınarynyń aınalasynda daǵdaryp qaldy. Qazaqstan Prezıdenti kúsh-jigerdi ınnovatsııalyq damýǵa, tehnologııalyq úderiske baǵyttap keledi. Eldiń básekege qabilettiligi tek qana jedel tehnologııalyq damýynda. Tórtinshiden, ıntellektýaldyq aýqym. AÓІSShK-ten Álemdik dinder forýmyna deıingi, EQYU sammıtinen EKSPO-2017-ge deıingi, elordany kóshirýden «2030» jáne «2050» strategııalaryna deıingi ishki jáne syrtqy sıpattaǵy barlyq iri jobalardyń negizinde naq Elbasynyń ıntellektýaldyq kúsh-qýaty jatyr. Al, osy jobalardyń árqaısysy qazirgi zamanǵy kez kelgen iri saıasatkerdi qurmetke bóleı alar edi. Barlyq osy derekter, ıdeıalar, oqıǵalar júıeli ári obektıvti baǵaǵa ıe bolýy tıis. Biraq bul ádettegi kezekti baıandaýdy emes, baıypty ǵylymı taldaýdy qajet etedi. Meniń oıymsha, bul bizdiń tarıhshylarymyzdyń aldynda turǵan mindettiń mańyzdy bóligi», - dedi Memlekettik hatshy.