Elbasy N.Nazarbaev QR Prezıdentiniń kezekten tys saılaýynda ózine senim artqan jaqtastaryna alǵys bildirdi
ASTANA. 4 sáýir. QazAqparat /Marlan Jıembaı/ - Elbasy Nursultan Nazarbaev QR Prezıdentiniń kezekten tys saılaýynda ózine senim artqan jaqtastaryna alǵys bildirdi. Memleket basshysy zor nıetin búgin túnde elordadaǵy saılaýaldy shtaby ornalasqan «Nur Otan» HDP-nyń Ortalyq apparatyna kelip, bildirdi.
«Men áý bastan bıyl ózimniń mynaý saılaýǵa baılanysty sharýalarymdy jasamaı, ózimniń kúndelikti jumysymmen shuǵyldanamyn dep, basqa da kandıdattarǵa múmkinshilik, mursha berdim. Qoǵamdyq shtabty júrgizgen myna turǵan Sizderge shyn júregimnen rızashylyǵymdy, rahmetimdi aıtamyn. Osyndaı shtabtar oblystarda, aýdandarda, aýyldarda jumys istedi. Barshańyzǵa zor rahmet», - dedi N.Nazarbaev.
Sondaı-aq Memleket basshysy ózin qoldaǵan 29 myń senimdi ýákilderine shyn kóńilden alǵys bildirdi. Bul oraıda ásirese saılaý barysynda belsendilik tanytqan jastarǵa alǵys aıtty. «Sebebi istep jatqan sharýanyń barlyǵy búgingi jastardyń, táýelsizdiktiń qurdastarynyń bolashaǵy úshin jasalyp jatyr. 88 myń volenter jumys istegen barshańyzǵa shyn júregimmen rahmetimdi aıtamyn. Barlyq halyqqa, komıssııa múshelerine, aıta berse, búkil qazaqstandyq azamattarǵa zor, sheksiz, myń rahmetimdi aıtamyn», - dedi Elbasy.
