Elbasy Mysyr Prezıdentine Kaır qalasyndaǵy terrorlyq aktige baılanysty kóńil aıtty
ASTANA. QazAqparat - Qazaqstan Respýblıkasynyń Prezıdenti Nursultan Nazarbaev Mysyr Arab Respýblıkasynyń Prezıdenti Ábdel Fattah As-Sısıge Kaır qalasynda bolǵan terrorlyq aktige baılanysty kóńil aıtý jedelhatyn joldady, dep habarlady Aqordanyń baspasóz qyzmeti.
Memleket basshysy terrorlyq akt týraly habardy zor kúızelispen qabyldady.
«Oqıǵa qurbandarynyń basym kópshiligi áıelder men balalar ekeni bárimizdi de beı-jaı qaldyrǵan joq. Qazaqstan qaýipsizdik pen beıbitshilikke qater tóndirip otyrǵan halyqaralyq ekstremızm men terrorızm aktilerin qatań aıyptaıdy. Kaırdegi terrorlyq akt órkenıetti álemde radıkaldy toptar men olardyń ıdeologııasyna oryn joq ekenine taǵy da kózimizdi jetkizdi», - delingen jedelhatta.
Nursultan Nazarbaev qaza bolǵandardyń otbasylary men jaqyndaryna, sondaı-aq barsha Mysyr halqyna Qazaqstan halqynyń jáne jeke óziniń atynan kóńil aıtyp, zardap shekkenderdiń tezirek saýyǵyp ketýine tilektestik bildirdi.
