Elbasy Myrzataı Joldasbekovti «Barys» ordenimen marapattady

ASTANA. QazAqparat - QR Prezıdenti Nursultan Nazarbaev memleket jáne qoǵam qaıratkeri, kórnekti ǵalym Myrzataı Joldasbekovti qabyldady, dep habarlaıdy Aqordanyń baspasóz qyzmeti.

Memleket basshysy kezdesýde M.Joldasbekovti 80 jasqa tolǵan mereıtoıymen quttyqtap, oǵan zor densaýlyq, uzaq ǵumyr tiledi.  

- Táýelsizdiktiń alǵashqy tańynan bastap Siz árdaıym meniń janymda boldyńyz. Maǵan qoldaý bildirip, keńesshim, Premer-Mınıstrdiń orynbasary bolyp qyzmet atqardyńyz. Men Sizdi jaýapty laýazymdarǵa taǵaıyndadym. Elshi, ýnıversıtet rektory boldyńyz, dıplomattardy tárbıeleýge atsalystyńyz. Belgili ǵalym, qalamger retinde keń tanyldyńyz, - dedi Qazaqstan Prezıdenti.

Sondaı-aq, Nursultan Nazarbaev kezdesýde M.Joldasbekovtiń el aldyndaǵy eńbegin eskerip, qoǵam qaıratkerin І dárejeli «Barys» ordenimen marapattady.

M.Joldasbekov óz qyzmetiniń nátıjelerin joǵary baǵalaǵany úshin Memleket basshysyna alǵys aıtty.

- Men táýelsizdigimizdiń qalyptasýyndaǵy barlyq protsestiń kýágeri boldym. Jaqsylyq ta, qıyndyq ta, tarshylyq ta bastan ótti. Baqytymyzǵa oraı, qazir egemendiktiń arqasynda jaqsy ómir súrip jatyrmyz. El ishinde reformalar júrgizilýde, bárimiz kútken rýhanı jańǵyrý bastaldy. Men qashan da Sizdiń qasyńyzda, senimdi serigińiz bolyp qala beremin, - dedi qoǵam qaıratkeri.