Elbasy munaı baǵasy jaıynda: Naryqty boljaı almaısyń
«Biz shıkizattyq emes sektor qurý úshin 6 jyl ındýstrııalandyrýmen aınalysyp kelemiz. Munaı men gazymyz, temir, qorǵasyn, myrysh, altyn, kúmisimiz bar. Biraq, naryqta baǵa konıýnktýrasy ózgerip otyrady. Munyń barlyǵy da bırjalyq taýarlar. Búgin bylaı, erteń olaı. Kezinde munaıdyń bir barreli 140 dollar bolsa, odan keıin 30-ǵa túsip ketti, qazir 50-60 dollar bolyp tur. Al erteń qalaı bolaryn bilmeımiz», - dep atap ótti Memleket basshysy «Jańa gýmanıtarlyq bilim. Qazaq tilindegi 100 jańa oqýlyq» jobasy aıasynda qazaq tilinde shyqqan oqýlyqtardyń tanystyrylymynda.
Elbasy osy rette, búginde álemde taqtatas gaz óndirý damyp, balama energııaǵa kóshý qarqyn alyp kele jatqanyn eske saldy.
«Sondyqtan bizge basqa ekonomıka qajet. Biz 6 jylda 120 jańa kásiporyn ashtyq. Bul bizge jetispeı turǵan múldem basqa kadrlyq deńgeı, basqa jalaqy, basqa adamdar, tehnıkalar, ınjenerler. Sondyqtan da barlyǵy ońaı emes», - dedi Nursultan Nazarbaev.
