Elbasy: Mınıstrler, mınıstrlerdiń orynbasarlary, oblys ákimderi qylmystyq jaýapqa tartyldy, eks-Premer tergelýde
ASTANA. QazAqparat - Jemqorlyqqa boı aldyrsa týǵan-týysyma da, dostaryma da, balalaryma da aıaýshylyq joq... Memleket qarjysyna qol suǵýǵa bolmaıdy. «Habar» telearnasynda ótken «Nazarbaevpen eń bastylar jaıly...» derekti fılmde Elbasy Nursultan Nazarbaev osyndaı málimdeme jasady.
«Nelikten sońǵy jyldary qylmystyq jaýapqa tartylǵan Pavlodar oblysy ákimin, Atyraý oblysynyń ákimin, Qaraǵandy oblysynyń ákimin esten shyǵaramyz. Olardyń barlyǵy da meniń tanysym boldy. Men uzaq ýaqyttan beri tanıtyn, zor qurmetpen qaraıtyn Qaraǵandy oblysynyń ákimi Premer-Mınıstr laýazymyna deıin kóterilgen bolatyn. Qazirgi ýaqytta ol tergelýde. Óıtkeni, faktiler bar. Buǵan aralasýǵa bolmaıdy», - dedi Elbasy.
Memleket basshysy osy rette jemqorlyqpen kúres jónindegi alǵashy zań qabyldanǵan kezde halyqqa arnaıy úndeý jarııalaǵanyn eske salyp ótti.
«Men óz týǵan-týystarymdy, dostarymdy, balalarymdy da bul rette aıaýshylyq bolmaıtyndyǵyn eskertemin. Muny telearna arqyly búkil elge aıttym. Qazir de taǵy qaıtalap aıtamyn. Mınıstrlerdi, mınıstrlerdiń orynbasarlaryn túrmege otyrǵyzdyq. Men basqalar jaıynda aıtyp otyrǵan joqpyn. ıAǵnı, qazirgi ýaqytta ymyrasyz kúres júrgizilýde jáne munyń barlyǵy beker dep oılamańyzdar. Adam ár ýaqytta óz qatelikterin moıyndamaıdy. Sondyqtan bul bizdiń barlyq sheneýnikterdi aıyqtyrýy tıis jáne olar bul rette eshqandaı qamqorshynyń bolmaıtyndyǵyn túsinýi qajet. Memleket qarjysyna qol suǵýǵa bolmaıdy», - dedi QR Prezıdenti.
