Elbasy metallýrg bolyp júrgen kezin esine aldy

NUR-SULTAN. QazAqparat – QR Tuńǵysh Prezıdenti – Elbasy Nursultan Nazarbaev Temirtaýda metallýrg bolyp eńbek etip júrgen kezin esine aldy. Elbasynyń baspasóz qyzmeti osyndaı shaǵyn vıdeo jarııalady, dep habarlaıdy QazAqparat tilshisi.

«Búgin bizdiń «Elbasy týraly faktiler» aıdarynda «Temirtaýda jas metallýrg Nursultan Nazarbaevqa zamanǵa saı jeke jylytylǵan páter bólipti degen sóz ras pa?» degen suraq qoıyldy», - dep jazady Tuńǵysh Prezıdenttiń baspasóz qyzmeti Instagram-daǵy paraqshasynda.

Bul suraqqa Nursultan Nazarbaev «joq» dep jaýap beredi.

«Ol kezde jataqhanalar tar edi, tórt jigit jerge tósek salyp jatatynbyz. Úsh-tórt jigitke kórpe jetpeı, túnde sýyq kezde qalǵan matrastardy ústimizge jaýyp alatynbyz. Osylaı uıyqtaıtyn edik. Óte sýyq bolatyn. Temirtaýdy bilesizder ǵoı. Batareıa sýyq. Jylytylmaıdy. Qurylys jumystarynyń alańynda da sol. Brezent arnaıy kıimdi keptirip qoıyp, ekinshi kúni kıseń, dymqyl bolyp turatyn. Ústińe kıip alsań, muz syqyr-syqyr etip, erı bastaıdy. Bunyń bári basymyzdan ótti», - deıdi Elbasy.