Elbasy: Medıtsına salasyndaǵy qazaqstandyq ǵalymdardyń jetistigi batystyń jetistikterimen para-par
ASTANA. QazAqparat - Medıtsına salasyndaǵy qazaqstandyq ǵalymdardyń jetistigi batystyń jetistikterimen para-par. Búgin Aqordada ál-Farabı atyndaǵy ǵylym men tehnıka salasyndaǵy memlekettik syılyqty tabystaý rásiminde Elbasy Nursultan Nazarbaev osylaı dedi.
«Medıtsına salasyndaǵy qazaqstandyq ǵalymdardyń jetistigi batystyń jetistikterimen para-par. Ózderińiz de kórip otyrǵandaı, medıtsına ǵylymyn, medıtsınany elimizde damytýdyń nátıjesinde kóptegen máselelerdi sheshýge múmkindik alyp otyrmyz. Kardıologııa, tirek-qozǵalý apparaty jáne basqa da baǵyttarda jetistikter bar. Solardyń arqasynda 10 jyl ishinde qazaqstandyqtardyń ómir súrý uzaqtyǵy ortasha eseppen 64-ten 72,3 jasqa deıin joǵarylady. Mine bul mańyzdy jetistik», - dedi QR Prezıdenti.
Aıta keteıik, «Urshyq býynynyń hırýrgııasynda endoprotezdeýdi qoldaný arqyly ınnovatsııalyq tehnologııalardy ázirleý jáne engizý» taqyrybyndaǵy jumysy úshin QR DSÁDM «Travmatologııa jáne ortopedııa ǵylymı-zertteý ınstıtýty» RMK-nyń dırektory, medıtsına ǵylymdarynyń doktory, professor Nurlan Batpenov, atalǵan ınstıtýttyń №3 ortapedııa bólimshesiniń meńgerýshisi, medıtsına ǵylymdarynyń kandıdaty Qaırat Áshimov, ınstıtýt dırektorynyń orynbasarlary, medıtsına ǵylymdarynyń doktory, professor Shalǵynbaı Baımaǵambetov, medıtsına ǵylymdarynyń kandıdaty, dotsent Qýanysh Ospanov, №4 ortopedııa bólimshesiniń meńgerýshisi, medıtsına ǵylymdarynyń kandıdaty Alekseı Belokobylov, №5 ortopedııa bólimshesiniń meńgerýshisi, medıtsına ǵylymdarynyń kandıdaty Erik Raımaǵambetov ál-Farabı atyndaǵy syılyqty alǵan bolatyn.
