Elbasy medali: Shyǵys Qazaqstanda 438 jas jobaǵa qatysýǵa ótinish bergen
«Elbasy medali» belsendi jáne talapty jastardy qoldaýǵa baǵyttalǵan joba. Oǵan «Tuńǵysh Prezıdent» qory qoldaý kórsetýde. Bul týraly ShQO aqparat ortalyǵynda ótken baspasóz brıfıngi barysynda oblystyq Bilim basqarmasynyń basshysy Saırangúl Jumadilova málimdedi.
«Jobaǵa qatysýshylarǵa jeti baǵyt usynylady. Atap aıtsaq, «Sport jáne dene shynyqtyrý», «Kitap oqý», «Daryn men daǵdy», «Ulttyq mura», «Eriktilik», «Týrıstik saıahattar» jáne «Eńbek tájirıbesi». Baǵdarlamany ázirleý barysynda úzdik álemdik tájirıbe qoldanylǵan. Baıqaýdyń sharty boıynsha oǵan 14 pen 29 jas aralyǵyndaǵy jastar qatysa alady», - dedi ol.
Basqarma basshysynyń aıtýynsha, «Elbasy medalin» árbir qazaqstandyq jas býyn ıelene alady. Baǵdarlamaǵa qatysý úshin me.fpp.kz onlaın platformasyna tirkelip, usynylǵan «altyn», «kúmis» nemese «qola» baǵyttaryn tańdaý kerek.
«Qatysýshylar tálimgerdiń kómegimen jeke damý baǵdarlamasyn jasaıdy. Tipti oǵan múmkindigi shekteýli jandar da qatysa alady. Medal ıegerleriniń upaılary teń bolǵan jaǵdaıda QR zańnamasynda belgilengen tártippen bilim grantyn jáne oblys ákiminiń grantyn alýǵa tolyq quqyǵy bar. Árıne, bul - jaǵymdyq jańalyq. Bizdiń oblysta da «Elbasy medali» baǵdarlamasyn damytýǵa barlyq jaǵdaı jasaldy. Oǵan aımaq basshysy Danıal Ahmetov te qoldaý kórsetip otyr. Búginde bul jobaǵa qatysýǵa 438 shyǵysqazaqstandyq ótinish bildirdi. Aldaǵy ýaqytta olardyń sany artady dep senemiz, - dedi Saırangúl Jumadilova.
