«Elbasy medali», «El maqtanyshy» jáne «Myń bala» jobasynyń jeńimpazdary marapattaldy
Marapattaý rásimi Nursultan Nazarbaev Qory uıymdastyrǵan «Táýelsizdik jolyn jalǵastyrar urpaq» atty jastar forýmynda ótti.
Elbasy Nursultan Nazarbaev forým qatysýshylary aldynda sóılegen sózinde Táýelsizdiktiń alǵashqy jyldarynan bastap memlekettiń básekege qabiletti jastardy tárbıeleýge basa nazar aýdaryp kele jatqanyn atap ótti.
«Jastar jyly aıasynda daryndy balalardy qoldaý maqsatynda men «El Úmiti» bastamasyn usyndym. Sonymen qatar, biz «Qamqorlyq» atty mańyzdy jobany iske asyra bastadyq», - dedi Elbasy.
Nursultan Nazarbaev «El Úmiti» jobasy eldiń belsendi jastaryn zııatkerlik jáne shyǵarmashylyq damý, ulttyq mádenıet pen dástúrdi túsiný, muqtaj jandarǵa kómek kórsetý jolynda biriktirgenin aıtty.
Forým aıasynda «Elbasy medali» jobasynyń qatysýshylaryna qola medaldar, halyqaralyq olımpıada júldegerleri men olardyń jattyqtyrýshylaryna «El maqtanyshy» syılyǵy jáne aýyl oqýshylary arasynda ótken «Myń bala» olımpıadasynyń jeńimpazdaryna syılyqtar tabystaldy.
«Búgin «El Úmiti» jáne «Qamqorlyq» bastamalaryna arnalǵan «Táýelsizdik jolyn jalǵastyrar urpaq» forýmy ótti. «El Úmiti» bastamasy aıasynda birqatar aýqymdy jobalar júzege asyrylýda. Birinshi joba – aýyl oqýshylaryna arnalǵan «Myń bala» olımpıadasy. Osylaısha Qazaqstan tarıhynda alǵash ret aýyl oqýshylary úshin jalpyulttyq olımpıada uıymdastyryldy. Oǵan barlyq aýyl mektepteriniń 5-6 synyp oqýshylary qatysa alady. Bıyl 300 myńǵa jýyq oqýshy qamtylyp, ekinshi kezeńdegi aqtyq saıysqa 5 myń adam jiberildi. Búgin barlyq óńirlerde myń jeńimpaz bala marapattalady. Osy oqý jylynan bastap 300-den astam jeńimpaz óńirlerdegi Daryn, Bilim ınnovatsııa lıtseıi, Respýblıkalyq Fızmat syndy daryndy balalarǵa arnalǵan mektepterde oqı alady. Qazir fınalıster men jeńimpazdar Elbasy Akademııasy janyndaǵy «Birge Oqý» onlaın mektebinde pándik daıyndyqtan ótip jatyr», - dedi «Elbasy Akademııasy» KQ dırektorynyń orynbasary Ánýar Janǵozın tilshilerge bergen suhbatynda.
Kelesi joba – «Elbasy medali» dep atalady. 14-29 jas aralyǵyndaǵy jastarǵa arnalǵan joba jastardy 7 negizgi baǵyt boıynsha tárbıeleýge baǵyttalǵan. Onda 6 aıdan 1,5 jylǵa deıingi qola, kúmis, altyn syndy qatysý deńgeıin tańdaı alasyz.
«Búgin biz alǵash ret jobaǵa jarty jyl qatysqandarǵa qola medal tabystadyq. Kelesi jyly medalıster sany kóbeıedi. Búginge deıin 300 medalıst bolsa, keler jyly 6 myńnan astam qola, kúmis jáne altyn medal ıegerleri bolady dep kútilýde. Al «El maqtanyshy» jobasy matematıka, fızıka, hımııa, bıologııa, ınformatıka, geografııa, lıngvıstıka pánderi boıynsha jeti negizgi olımpıadanyń jeńimpazdaryna arnalǵan. Ótken jyly Elbasy marapatty alǵash ret tabystady, bıyl da ony jalǵastyramyz. Aqshalaı yntalandyrý tek jeńimpazdar úshin ǵana emes, olardyń jattyqtyrýshylary úshin de qarastyrylǵan. Syıaqy mólsheri 500 myńnan 2 mıllıon teńgege deıin jetedi. Bıyl 11 jeńimpaz ben 17 jattyqtyrýshy marapattaldy», - dep túsindirdi Á. Janǵozın.
«Salalyq menedjer» jobasy úlken býyn men kásibı mamandarǵa arnalǵan. Bul jobada 3 myń úmitkerden 230 maman iriktelip alyndy, olar 11 sala boıynsha baǵdarlamalardy júzege asyrýda. Olarǵa 37 tapsyrma berildi jáne olardy toptasyp ázirledi.
«Josparlardyń barlyǵy derlik Úkimetke, Premer-Mınıstrge tanystyryldy. Bul josparlar tek baǵdarlamalar deńgeıinde qalyp qoımaı, kelesi jyly júzege asýy úshin salalyq mınıstrliktermen jumys júrip jatyr», - dedi Á. Janǵozın.
