Elbasy medaldarymen marapattalǵan 18 qaraǵandylyq bilim grantyn aldy
QARAǴANDY. QazAqparat – Bilim granttaryn alýǵa arnalǵan konkýrsqa Elbasynyń 821 medal ıegeri qatysty. Upaı sanymen salystyrǵanda basymdyqqa ıe bolǵan jobaǵa qatysýshy 605 talapker tegin oqýǵa múmkindik aldy. Onyń 18-i Qaraǵandy oblysynan, dep habarlaıdy QazAqparat tilshisi.
Granttardyń eń kóbin Nur-Sultan men Almaty, sondaı-aq Qyzylorda men Pavlodar oblystarynyń bolashaq stýdentteri aldy. Medal ıegerleri arasynda eń tanymal oqý oryndary Ál-Farabı atyndaǵy Qazaq ulttyq ýnıversıteti, L.N. Gýmılev atyndaǵy Eýrazııa ulttyq ýnıversıteti, Súleımen Demırel atyndaǵy Ýnıversıtet jáne Astana IT University boldy.
«Elbasy akademııasy jobalarynyń árbir qatysýshysy -bizdiń maqtanyshymyz. «Elbasy medali» jobasy daryndy jastar, ásirese aýyl balalary úshin mańyzdy qoldaý bolatynyn kórip otyrmyz. Jaqyn arada biz jastardy qoldaý úshin taǵy da birneshe jobany iske qosýdy josparlap otyrmyz jáne olarǵa turǵylyqty jerine qaramastan, árbir jas qazaqstandyqty qatysýǵa shaqyramyz», – dedi «Elbasy akademııasy» KQ dırektory Aslanbek Amrın.
Ulttyq deńgeıdegi joba jastardy keshendi damytýǵa baǵyttalǵanyn eske sala keteıik. Baǵdarlama jeti negizgi baǵyttan turady: sport, talanttar men daǵdylar, kitap oqý, ulttyq mura, volonterlik, ekspedıtsııalar men joryqtar, eńbek tájirıbesi. Baǵdarlama 14 pen 29 jas aralyǵyndaǵy jastarǵa arnalǵan.
