Elbasy Máskeý memlekettik ýnıversıtetiniń Qazaqstan fılıalyn 20 jyldyǵymen quttyqtady
Qurmetti qonaqtar arasynda QR Prezıdenti Ákimshiliginiń, QR Tuńǵysh Prezıdenti – Elbasy Keńsesiniń, QR Parlamentiniń depýtattyq korpýsynyń, Reseı Elshiliginiń, Qazaqstandaǵy Rossotrýdnıchestvo ókildigi jáne MMÝ qazaqstandyq fılıalynyń ár jyldardaǵy túlekteri, oqytýshylar, stýdentter boldy.
Salatanatty jıynynda Qazaqstan Respýblıkasynyń Memlekettik hatshysy Qyrymbek Kósherbaev QR Tuńǵysh Prezıdenti – Elbasy Nursultan Nazarbaevtyń quttyqtaý hatyn oqyp berdi.
«M. V. Lomonosov atyndaǵy MMÝ Qazaqstan fılıalynyń ujymyna! Sizderdi M. V. Lomonosov atyndaǵy Máskeý memlekettik ýnıversıtetiniń Qazaqstan fılıalynyń qurylǵanyna 20 jyl tolýymen quttyqtaımyn. Meniń bastamam boıynsha jáne RF Prezıdenti V.V. Pýtınniń qoldaýymen qurylǵan bul joǵary oqý orny – qos eldiń dostyǵy men strategııalyq áriptestiginiń jarqyn úlgisi boldy. Men 1994 jyly Eýrazııalyq odaqty qurý ıdeıasyn da Máskeý ýnıversıtetinde aıtqan edim. Al qazir onyń fılıaly Eýrazııanyń ortalyǵynda tabysty qyzmet etýde», - deıdi N. Nazarbaev.
Óz sózinde Elbasy fılıal túlekteriniń Táýelsizdiktiń 30 jyldyǵyn atap ótip jatqan Qazaqstannyń damýy men gúldenýine laıyqty úles qosyp júrgenderin atap ótti.
«Zamanaýı jáne keńinen oılaıtyn mamandardy darıalaý jáne birlesken ǵylymı zertteýler júrgizý otandyq joǵary bilim kóshbasshylarynyń biri retinde JOO áleýetin odan ári ósirýge yqpal etedi. MMÝ Qazaqstan fılıalynyń ujymyna elimizdiń ıgiligi úshin jańa tabystar men jetistikter jáne Qazaqstan-Reseı yntymaqtastyǵyn ári qaraı ilgeriletýdi tileımin», - dedi N. Nazarbaev.
Aıta keteıik, M. V. Lomonosov atyndaǵy MMÝ Qazaqstan fılıaly QR Tuńǵysh Prezıdenti - Elbasy Nursultan Nazarbaevtyń bastamasymen jáne RF prezıdenti Vladımır Pýtınniń qoldaýymen qurylǵan.
2000 jylǵy 9 qazanda Reseı Federatsııasynyń Prezıdenti V.V. Pýtınniń Qazaqstan Respýblıkasyna jasaǵan memlekettik saparynda MMÝ rektory, akademık V.A. Sadovnıchıı men QR Bilim jáne ǵylym mınıstri Q.E.Kósherbaev Astana qalasynda L.N.Gýmılev atyndaǵy Eýrazııalyq ulttyq ýnıversıtettiń bazasynda M.V. Lomonosov atyndaǵy Máskeý memlekettik ýnıversıtetiniń Qazaqstan fılıalyn qurý týraly hattamaǵa qol qoıǵan bolatyn.
