Elbasy mártebesin zańnamalyq deńgeıde naqtylaý aıaq astynan týyndaǵan másele emes - Á. Jolshybekov
ASTANA. Mamyrdyń 5-i. QazAqparat /Qanat Mámetqazyuly/ ‑Elbasy mártebesin zańnamalyq deńgeıde naqtylaý aıaq astynan týyndaǵan másele emes.
Búgin QR Parlamenti Májilisiniń jalpy otyrysynda QR Prezıdentiniń mártebesin naqtylaýǵa qatysty zań jobasyna bastamashylyq jasaǵan depýtat Ámzebek Jolshybekov jýrnalısterge bergen suhbatynda osylaı málim etti, dep habarlaıdy QazAqparat.
«Birinshiden - zań jobasyna bastamashylar elimizdiń Memleket basshysynyń bastamalaryna, onyń eren eńbegine qanyqpyz. Tarıhqa júginip - Keńes Odaǵy ydyraǵannan keıingi kezeńde óz aldyna derbes el bolǵandardyń barlyǵymen salystyryp qaraıyq. Ótken on toǵyz jylda ár memlekettiń damý deńgeıi ártúrli boldy. Qudaıǵa shúkir Qazaqstan búgingi kúni ekonomıkalyq, saıası jáne áleýmettik damýda oń nátıjelerdi baǵyndyrdy. Biz osy memlekette turǵanymyzǵa qýanatyn boldyq. Al buny aıtý qanshalyqty jeńil bolǵanymen, ony qalyptastyrýdyń sonshalyqty qıyn bolǵanyn sezinýge tıispiz. Osy turǵyndan alǵanda QR Prezıdenti «aldymen ekonomıka, sodan keıin saıasat» uranymen el damýyn satylap júrgizdi», dedi Á. Jolshybekov.
Sonymen birge, Elbasynyń eren eńbegine toqtala kele depýtat, Tuńǵysh Prezıdent-Ult Kóshbasshysy mártebesin naqtylaý aıaq astynan týyndaǵan másele emes ekendigin alǵa tartty. Onyń aıtýynsha, bastamashyl depýtattar toby byltyrǵy jyldyń kúzinen beri saılaýshylardyń úndeýleri, tilek-nıetterin eskere kele bulardyń barlyǵyn biregeı zań júzinde qalyptastyryp, kórsetýge tyrysqan.
«Biz zań shyǵarýshylarmyz, bilikti zańgerler de bizdiń bastamamyzǵa kóp járdem berdi. Sondyqtan da bundaı bastama máselesine túsinistikpen qaraý kerektigin suraımyz», dedi Á. Jolshybekov.
