Elbasy maqalasynda aıtylǵan máseleler - daıyn medıajobalar - Qarın
ASTANA. QazAqparat - «Qazaqstan» RTRK» AQ-nyń basqarma tóraǵasy Erlan Qarın Elbasynyń maqalasyna qatysty «Egemen Qazaqstan» respýblıkalyq basylymynyń tilshisine bergen suhbatynda maqalada aıtylǵandardyń daıyn medıajobalar ekendigin aıtty, dep habarlaıdy QazAqparat.
«Elbasy maqalasynda aıtylǵan máseleler - daıyn medıajobalar. Bas basylymda jarııalanǵannan keıin korporatsııada maqalany talqylaǵan jıyn ótkizdik. Dástúr boıynsha «Qazaqstan» ulttyq arnasy da kúzgi maýsymǵa ázirlenip jatyr. Shyn máninde, maqalada aıtylǵan máseleler ulttyq arna úshin daıyn platforma, daıyn tujyrymdama. Biz barlyq taqyrypty kúzgi maýsym aıasynda kórermenge usynýdy pysyqtap jatyrmyz. Máselen, «Men - qazaqpyn!» atty úlken jobany engizbekpiz. Dástúrli án men kúıdi, termeni nasıhattaıtyn telejoba birneshe aıǵa sozylady. Óńirlerdi tolyq qamtıtyn osy joba arqyly ulttyq rýhanı baılyǵymyzdy kórsetemiz. Odan basqa týǵan jer, kıeli oryndarǵa baılanysty derekti fılmder, realıtı-shoý túsirý kózdelgen. Raýan Kenjehanuly sııaqty áriptesterimizben áńgimelese otyryp, oqýlyqtarǵa baılanysty beınedárister uıymdastyrýǵa, aýdıokitaptar jobasyn shyǵarýǵa sheshim qabyldadyq. Basqa da jobalar bar. Sátin salsa, maýsym jaqyndaǵanda tanystyramyz»,-deıdi basqarma tóraǵasy.
Onyń sózinshe, ulttyq arna Memleket basshysy aıtqan máselelerdi efırden talqylaýǵa birden kirisip ketken. Óıtkeni, maqala jarııalanar aldynda arna kestesine birqatar jańa qoǵamdyq-saıası baǵdarlamalar jelisin engizilgen. Máselen, «Basty taqyryp» jańa sarapshylardy tartýdy kózdeıdi. Sondaı-aq «1 stýdııa» sııaqty saıası tok-shoý shyqty. «Parasat maıdany» shyǵarmashylyq toptarmen áleýmettik-qoǵamdyq máselelerdi talqylaýdyń jańa formasyn qarastyrady. Qazaq radıosynda da jańa baǵdarlamalar bar.
«Osy arqyly medıaqurylymdardaǵy aǵartýshylyq baǵytty kúsheıtýdi qolǵa aldyq. Sońǵy ýaqytta arnalar oıyn-saýyq baǵytyna áýestenip ketkeni belgili. Árıne, onsyz bolmaıdy, kórermenniń qyzyǵýshylyǵyn oıatýymyz tıis. Biraq ulttyq arna men qazaq radıosy aǵartýshylyq baǵytty umytpaýy kerek. Elbasy maqalasy osy mıssııany qolǵa alýymyzǵa negiz bolyp otyr»,-deıdi Qarın.
