Elbasy maqalasy jastarǵa jol kórsetedi
Maqalasynyń «Bilimniń saltanat qurýy» dep atalatyn bóliminde Prezıdent: «...Bilimdi, kózi ashyq, kókiregi oıaý bolýǵa umtylý - bizdiń qanymyzda bar qasıet. Biz búgingi jańa ataýly erteń-aq eskige aınalatyn, júrisi jyldam dáýirge aıaq bastyq. Bul jaǵdaıda kásibin neǵurlym qınalmaı, jeńip, ózgertýge qabiletti, asa bilimdar adamdar ǵana tabysqa jetedi. Osyny bek túsingendikten, biz bilimge bólinetin bıýdjet shyǵystarynyń úlesi jóninen álemdegi eń aldyńǵy qatarly elderdiń sanatyna qosylyp otyrmyz», - dep, ozyq bilim men jańa, tól ǵylymdy ıgergen eldiń keleshegi baıandy bolatynyna erekshe nazar aýdarady.
Osy tusta basa eskertip ótetin nárse, jastarǵa, elimizdiń bolashaq ıelerine durys jol kórsetip, jónge salý óte mańyzdy is der edik. Kerek deseńiz, bul sala mańyzdylarynyń ishindegi mańyzdysy.
Elbasy aıtyp júrgen búkilqazaqstandyq birtektiliktiń rýhanı ustyny tálim-tárbıe berýshi qurylymdardyń is-áreketterimen tikeleı baılanysyp jatyr. Demek, bilim berý salasyna, onyń búkil qurylymdaryna «...Oqytý arqyly tárbıeleý jáne minez-qulyqty qalyptastyrý» degen burynǵy basty gýmanıtarlyq ustanymdy qaıtarǵanymyz abzal.
Mundaǵy bilim berý men árbir adamnyń ıntellektýaldyq mádenıetin, ulttyń sanasyn kemeldendirýdi kózdegendegi basty maqsat - zaman talabyna laıyq jan-jaqty bilimdi, básekege qabiletti bolý óz aldyna, ýaqytty únemdi, utymdy qoldaný, ıaǵnı, eńbekti ǵylymı turǵyda uıymdastyra bilý, qaǵazbastylyqtan arylý, kásibı biliktiligi joǵary, talantty adamdy qoldap-qorǵaý, oǵan dańǵyl jol ashý, ádiletsizdik, opasyzdyq, ekijúzdilik sekildi keleńsiz isterge toıtarys berý, úırengen bilimdi isinde, sózinde, qımyl-áreketterinde qoldaný, ıaǵnı, beınelep aıtqanda, tirshilikke qajetti sáýleni syrttan almaı, óz janyńnyń túkpirinen izdep tabý, sony alý.
Eger, bilim men mádenıetti damýdyń strategııalyq rýhanı resýrsy dep qarastyratyn bolsaq, onda ekonomıkadaǵy, tehnologııadaǵy, tipti, qoǵamdyq qarym-qatynastardaǵy kóptegen ózekti máseleler ózinen-ózi sheshimin tabatyny sózsiz. Bular - birbetkeılik pen ashý-yzaǵa, beıbereketsizdik pen zorlyq-zombylyqqa, ıaǵnı bizdiń ómirimizdiń barlyq salasyndaǵy tártipsizdikterge qarsy tura alatyn asyl qasıetter.
Elbasynyń osy maqalada kótergen taǵy bir mańyzdy máselesi - týǵan jerge degen mahabbat. Shyndyǵynda da, týǵan jerdi qorǵaý, týǵan elge qyzmet etý bilimniń kóptiginen emes, eldik sanaǵa týǵan jer men elge degen súıispenshilikpen baılanysty bolatyny belgili. Óziniń týǵan jeri men ósken ólkesiniń kórkeıýine úles qosa bilgen árbir azamat búkil eldiń ıgiligi úshin qyzmet ete alady. Bul - aksıoma.
Dana halqymyzdyń: «Otan - otbasynan bastalady», - deýi sondyqtan. Maqala avtory bul jaıynda bylaı deıdi: «Qazaq «týǵan jerge týyń tik» dep beker aıtpaǵan. Patrıotızm kindik qanyń tamǵan jerińe, ósken aýylyńa, qalań men óńirińe, ıaǵnı, týǵan jerińe degen súıispenshilikten bastalady. Sol sebepti, týǵan jerge onyń mádenıeti men salt-dástúrine aıryqsha ińkárlikpen atsalysý - shynaıy patrıottyqtyń mańyzdy kórinisteriniń biri».
Sondyqtan da, ulttyń patrıottyq rýhyn jańǵyrtýda «Týǵan jer», «Qazaqstannyń kıeli jerleriniń geografııasy» atty baǵdarlamalarynyń máni orasan zor. Túsingen adamǵa «Týǵan jer» degenimizdiń ózi - «Kıeli meken» degen maǵyna beredi, al, ol tutastaı alǵanda, «Uly dala eli» degen úlken uǵymǵa alyp keledi.
Dúnıe - dóńgelek. Ýaqyt sol dóńgelektiń boıymen zyr qaqqan urshyqqa uqsaıdy. Ýaqyttyń urshyǵy árqashan is-árekette, qozǵalys ústinde kórinedi. ıAǵnı, ýaqyt bir orynda turmaıdy, ol alǵa ozǵan saıyn ózgeristerge túsip otyrady.