Elbasy maqalasy ulttyq murattarymyzdy saralaıdy - Baqytjan Jumaǵulov
«Táýelsizdigimizdiń 30 jyldyǵynyń qarsańynda Qazaqstan Respýblıkasynyń Tuńǵysh Prezıdenti - Elbasy Nursultan Ábishuly Nazarbaevtyń «Táýelsizdik taǵylymy» atty maqalasy jarııalandy. Babalarymyz armandaǵan eldik pen erkindiktiń sımvoly bolyp jalǵasqan uly armany – Táýelsizdik edi. Ulan qaıyr zamandardyń tarıhı kartınasyn Elbasy maqalasynan kóresiń. Saqtar men ǵundar, odan soń túrki halqy Uly dalada óz memleketin qurdy. Elbasy daýyldar men dabyldar, «jan alysyp, jan berisken», «egeýli naıza» ustaǵan yqylym zamandardan beri ultymyzdyń baǵa jetpes ózindik dástúrleri men ǵurpyn, erkindiktiń rýhy men rýhanı keńistigin, ǵajaıyp tili men sulý sazyn saqtap qalǵan qasıetterin tebirene jazady. Ǵasyrlar toǵysynda adamzat tarıhynda, onyń ishinde Qazaqstan tarıhynda erekshe orny bar Táýelsizdik salmaǵyn kóterý óz taǵdyryna tıesili ekenin joǵary jaýapkershilikpen jetkizedi. Árıne, Elbasy júregindegi sóz – tarıh sózi, zaman sózi, urpaq sózi», - dep atap ótti B. Jumaǵulov.
Senatordyń aıtýynsha, Keńester odaǵynyń tarıhı joldaryna sholýdy da osy maqaladan taba alasyń. Ótken ǵasyrdyń 70-shi jyldaryndaǵy jaǵdaı, odan keıin Gorbachevtik «qaıta qurý» saıasaty da qalaı kúıregenin Elbasy ashyq jazady.
«Rasynda, Elbasy jazǵandaı, Qazaqstan halqy «bir jaǵadan bas shyǵardy». Ortaq maqsat úshin nebir qıyndyqtardy jumyla jeńdi, ulttyq birlik pen tatýlyqqa qol jetkizdi. Ótken tarıh – ketken tarıh emes. Ol – ult jadynda, urpaq sanasynda qalatyn qıyn, zobalań jyldarǵa ulasqan tarıh bolsa da, babalar armanyn júzege asyrǵan tarıh. Maqalada Elbasy halyq rýhyna bas ıedi. Qıynshylyqqa kóndi, biraq moıyǵan joq, úmiti úziler jerde – bolashaqqa sendi, keri emes – alǵa júrdi. Uly Otan soǵysy jyldarynda Otan úshin ot keshti. Bul – taǵylymdyq maqala. Bul – Táýelsizdik jolynyń jylnamasy. Otyz jyl boıy Elbasy óziniń búkil ǵumyry men saıasaty halyq taǵdyryn, ult taǵdyryn, táýelsizdikti saqtaýǵa arnalǵanyn eline, jas urpaqqa syr etip aıtady. Sonyń nátıjesinde Qazaqstan órkenıetti 40 eldiń qataryna qosylyp otyr. Maqala ulttyq murattarymyzdy saralaıdy. Bolashaq jolymyzdy aıǵaqtaıdy. Elbasy júreginen shyqqan sóz tarıhılyǵymen, shynaıylyǵymen erekshelenedi. Ózi qurǵan jáne qalyptastyrǵan Táýelsizdik qundylyqtarynyń ulttyq biregeılik pen ulttyq tatýlyq sımvoly retinde, tarıhı jádiger retinde qala beredi. Elbasy joly – Qazaqstan joly ekenine kóz jetkizesiń», - deıdi depýtat.
