Elbasy maqalasy bolashaqqa adastyrmas baǵdar jasaýǵa bastaıdy - Raýshan Qaparova

ASTANA. QazAqparat  - Memleket  basshysynyń «Uly dalanyń jeti qyry» maqalasy elimizdiń rýhanı ómirinde úlken serpilis týǵyzatyn kezekti mańyzdy dúnıe. Jezqazǵan tarıhı-arheologııalyq mýzeıiniń basshysy Raýshan Qaparova osyndaı pikir bildirdi.

«21 qarashada jarııalanǵan maqala san ǵasyr boıyna qalyptasqan  Uly dala mádenıetine keńinen saraptama jasap, ótkenniń órnekti tustaryn kemel keleshek qalyptastyrý jolynda úılesimdi qoldanýǵa úndeıdi. Bul Elbasynyń 2017 jyly sáýir aıynda jarııalanǵan «Bolashaqqa baǵdar: rýhanı jańǵyrý» maqalasynyń zańdy jalǵasy ispettes. Olaı deıtinimiz «Rýhanı jańǵyrý» baǵdarlamasy mádenı, tarıhı qundylyqtarymyzdyń rýhanı ómirimizde alar ornyna toqtala kele, HHІ ǵasyrdaǵy ulttyq sananyń syr-sıpatyn aıshyqtap berse, myna maqala álemdik órkenıette ózindik orny bar Uly dala mádenıetin taný, zertteý jumystaryn jańa deńgeıge kótermek», - deıdi Raýshan Qaparova.

Sondaı-aq, ol keıingi jyldary belgili bolǵan mádenı jádigerler Uly dalanyń jahandyq tarıhtaǵy ornyna tyń kózqaraspen qaraýǵa múmkindik beretinin aıtady. Elbasy da «Bul - tarıhqa degen durys ustanym. Sol arqyly qazaq halqynyń túp-tamyrymyzdy bilýge, ulttyq tarıhymyzǵa tereń úńilip, onyń kúrmeýli túıinin sheshýge múmkindik týady. Qazaqstan tarıhy da jeke jurnaqtarymen emes, tutastaı qalpynda qazirgi zamanaýı ǵylym turǵysynan qaraǵanda túsinikti bolýǵa tıis. Oǵan qajetti dáıekterimiz de jetkilikti» dep atap ótken edi.

Mýzeı basshysynyń sózinshe, maqalada «Bizdiń tarıhymyzda qasiretti sátter men qaıǵyly oqıǵalar, surapyl soǵystar men qaqtyǵystar, áleýmettik turǵydan qaýipti synaqtar men saıası qýǵyn-súrginder az bolmady. Muny umytýǵa haqymyz joq. Kópqyrly ári aýqymdy tarıhymyzdy durys túsinip, qabyldaı bilýimiz kerek» degen joldar bar. «Uly dalanyń jeti qyry» - sol tarıhty durys túsinip, ótkennen taǵlym alýǵa, bolashaqqa adastyrmas baǵdar jasaýǵa bastaıtyn qundy maqala.