Elbasy maqalasy bolashaǵymyzdyń kókjıegin aıqyndaýǵa jol ashady - Kókshetaý ǵalymdary
Sharaǵa bilim ordasynyń oqytýshylary men stýdentterinen bólek, qoǵam ókilderi de qatysty. Olardyń arasynda murajaı, bilim salasy tárizdi kóptegen salalardyń ókilderi boldy. Tanymdyq kezdesýde uıymdastyrý ıdeıasyna Aqmola oblysynyń ishki saıasat basqarmasy qoldaý bildirdi.
Shoqan Ýálıhanov atyndaǵy Kókshetaý memlekettik ýnıversıtetiniń rektory Marat Syrlybaev maqalanyń tarıhı mańyzdylyǵyn toqtaldy.
«Elbasy Nursultan Nazarbaevtyń «Uly dalanyń jeti qyry» atty maqalasy ózekti jáne ýaqtyly jarııalanyp otyr. Bul bizge ótkenimiz ben búgingimizdi saralap, erteńimiz ben bolashaǵymyzdyń kókjıegin aıqyndaýǵa jol ashady. Maqalanyń basty ıdeıasy óz tarıhyna degen eýropashyldyq kózqarastan arylý bolyp tabylady. Bul ǵylymı faktilerge súıene otyryp, tereń jáne kúrdeligine qaramastan qazaq halqy men ulttyq tarıhynyń bastaýyn túsinýge kómektesedi», - dedi ýnıversıtet rektory.
Sondaı-aq, «Uly dalanyń - Uly tulǵalary» taqyrybynda baıandama jasaǵan tarıh ǵylymdarynyń doktory, professor Qadyrjan Ábýovtyń oıy da bir jerden shyqty. Ol óz sózinde qazaqtardyń arǵy tegi tarıhtyń baǵytyn óz eliniń aýmaǵynda ǵana emes, syrtta da ózgertkenin atap ótti.
«Bizdiń maqtan tutatyn tulǵalarymyz az emes. Olardyń arasynda Abylaı han, Úmbeteı jyraý, Kenesary, Shoqan Ýálıhanov bar», - dedi Qadyrjan Ábýov.
Ǵalym qazaq halqynyń tarıhyna degen qyzyǵýshylyq ǵalymdar álemin ǵana emes, ózge elderdiń týrısteriniń boıynda da qalyptastatynyna senimdi. Tarıh ǵylymdarynyń kandıdaty, dotsent, otandyq tarıh jáne «Rýhanı jańǵyrý» kafedrasynyń meńgerýshisi Qanat Bazarov «Uly dala-álemdik órkenıet besigi» taqyrybynda óziniń pikirimen bólisse, fılologııa ǵylymdarynyń kandıdaty Amanjol Esmaǵulov birneshe aýdanǵa uıymdastyrylǵan arhelogııalyq saıahat kezinde stýdentter ózderiniń Uly tarıhyn qalaı tanyp jatqandyǵy týraly aıtyp berdi.
Sonymen qatar, fılosofııa ǵylymdaryń kandıdaty, dotsent Raýza Abdýlına, tarıh ǵylymdarynyń kandıdaty, dotsent, Marat Ótegenov, jalpy tarıh kafedrasynyń oqytýshysy, gýmanıtarlyq ǵylymdardyń magıstri Ǵalymtaı Tólepbergenov jáne orys fılologııa jáne kitaphana isi kafedrasynyń aǵa oqytýshysy Sapar Qasenov Elbasy óziniń «Uly dalanyń jeti qyry» atty maqalasynda ult tarıhyndaǵy keńistik pen ýaqyt, tarıhı sanany jańǵyrtýdy jan-jaqty taldap, tereń fılosofııalyq tolǵam jasaǵanyn tarıhı derekter keltire otyryp jetkizdi.
«Ulttyq sana-sezimdi jańǵyrtýdyń mańyzy zor. Qazaqstan qaı jaǵynan alsa da brend bolýy tıis. Mysal retinde qazaqtyń ár aýylynda óndiriletin ulttyq sýsynymyz qymyzdy alýǵa bolady. Sondaı-aq, ulttyq sport túrlerin damytýǵa da kóp kóńil bólýimiz qajet», - dedi Ǵalymtaı Tólepbergenov.
Sharada qatysqan Aqmola oblysy ishki saıasat basqarmasynyń basshysy Gúljanar Shókeeva ýnıversıtet ǵalymdarynyń Elbasy maqalasyn jiktep aıtyp bergeni úshin alǵysyn aıta kele, elimizdiń keleshek jastarynyń sanasyna jetkizýde ólsheýsiz úles qosatyndyqtaryna senim bildirdi.
Konferentsııa qorytyndysy boıynsha QR Prezıdenti Nursultan Nazarbaevtyń atyna Aqmola oblysy ǵalymdarynyń atynan úndeý qabyldandy.
