Elbasy magıstraldiń ashylýyn jyldyń eń mańyzdy áleýmettik-ekonomıkalyq oqıǵasy dep atady

ASTANA. QazAqparat - Memleket basshysy N.Nazarbaev «Jezqazǵan-Beıneý» jáne «Arqalyq-Shubarkól» temirjol jelileriniń ashylýyna qatysty. Іs-sharaǵa oraı Jezqazǵan qalasynyń ortalyq alańynda jańa temirjoldyń Qostanaı, Qyzylorda, Aqtóbe, Mańǵystaý jáne Qaraǵandy oblystarynyń aýmaǵynda ornalasqan basty stansalarymen arada telekópir uıymdastyryldy. Stansa basshylary Qazaqstan Prezıdentine jańa jol qatynasyn paıdalanýǵa berýge daıyn ekenin baıandady, dep habarlaıdy Aqordanyń baspasóz qyzmeti.

Nursultan Nazarbaev «Jezqazǵan-Beıneý» jáne «Arqalyq-Shubarkól» jańa temirjol jelilerin saltanatty jaǵdaıda iske qosty.

Barsha qazaqstandyqtardy quttyqtaǵan el Prezıdenti magıstraldiń ashylýyn jyldyń eń mańyzdy áleýmettik-ekonomıkalyq oqıǵasy dep atady.

- «Jezqazǵan-Beıneý» jáne «Arqalyq-Shubarkól» joly birneshe óńir men búkil Respýblıkanyń tirshiligine jan bitirip, ondaǵan jyldarǵa alǵa jeteleıdi. Biz Táýelsizdiktiń barlyq kezeńinde temirjol qurylysyn toqtatqan joqpyz, qaıta údete tústik, - dedi Nursultan Nazarbaev.

Sondaı-aq Memleket basshysy temirjol qurylysyna 10 myńnan astam adam tartylǵanyn, endi taǵy 3 myń adam turaqty jumyspen qamtylatynyn aıtty.

- «Jezqazǵan-Beıneý» jáne «Arqalyq-Shubarkól» temirjoldary japsarlas aýmaqtardyń damýyna jańa serpin beredi. Onyń áserin Qaraǵandy, Mańǵystaý, Aqtóbe, Qyzylorda jáne Qostanaı oblystarynyń turǵyndary men kásiporyndary tikeleı sezinetin bolady. Agrarlyq jáne ónerkásiptik ónimderdi jetkizý merzimi men qashyqtyǵyn qysqartýdan búkil Qazaqstan utady, - dedi Prezıdent.

Sonymen qatar, Memleket basshysy jańa temirjoldar Jezqazǵannyń damýyna oń yqpalyn tıgizetinin, endi bul óńir respýblıkalyq jáne halyqaralyq mańyzdaǵy strategııalyq baǵytta bolatynyn atap ótti.

Qazaqstan Prezıdenti eldiń kólik-logıstıkalyq áleýetiniń artatynyna toqtaldy.

- Osy temirjol jelilerin iske qosý - Soltústik-Ońtústik jáne Shyǵys-Batys baǵyttardaǵy jahandyq kólik qyzmetteri úshin de aıtýly oqıǵa. Іs júzinde biz Qytaıdan Eýropaǵa júk jetkizý ýaqytyn úsh eseden asa qysqartatyn tranzıttik dálizdiń ózimizge tıesili bóligin jasadyq. Bul - múlde jańa áleýet jáne ony tolyǵymen paıdalaný qajet, - dedi Memleket basshysy.

Ashylý rásimi kezinde «Qazaqstan temir joly» UK» AQ prezıdenti A. Mámın qurylys jumystarynyń barysy men onyń ekonomıkalyq tıimdilik kórsetkishteri týraly baıandady. Sondaı-aq Qazaqstandaǵy «Arselor Mıttal» kompanııalar tobynyń dırektory V.Mahadevan, eldiń qurmetti temirjolshysy A.Selbaev jáne eńbek ardageri B.Myrzabekov sóz sóıledi.

«Jezqazǵan-Beıneý» jáne «Arqalyq-Shubarkól» temirjoldarynyń jalpy uzyndyǵy 1200 shaqyrymnan asady. «Jezqazǵan-Beıneý» magıstralin iske qosý Ortalyq Qazaqstannan Aqtaý portyna, Túrikmenstanmen shekaraǵa deıin jáne Parsy shyǵanaǵy baǵytynda eń qysqa temirjol qatynasyn qurýǵa múmkindik beredi. «Arqalyq-Shubarkól» temirjol jelisi Qazaqstannyń ortalyǵynan Reseıge, odan ári Batys Eýropa elderine shyǵýdy qamtamasyz etedi.