Elbasy «Lýkoıl» kompanııasynyń prezıdenti Vagıt Alekperovti qabyldady

NUR-SULTAN. QazAqparat - Nursultan Nazarbaev «Samuryq-Qazyna» ulttyq ál-aýqat qory» AQ basqarma tóraǵasy Almasadam Sátqalıev pen «Lýkoıl» kompanııasynyń prezıdenti Vagıt Alekperovti qabyldady, dep habarlaıdy QazAqparat Elbasynyń resmı saıtyna silteme jasap.

Kezdesýde munaı-gaz salasyndaǵy áriptestikti damytý máseleleri men ınvestıtsııalyq jobalardy júzege asyrý jospary talqylandy.

– «Lýkoıl» kompanııasy Qazaqstanda burynnan kele jatqan iri ınvestorlardyń biri. Sizder «Teńiz», «Qarashyǵanaq» sııaqty ken oryndarynda jumys isteısizder, «Kaspıı qubyr konsortsıýmynyń» ınfraqurylymdyq jobasyna qatysyp jatyrsyzdar, – dedi «Samuryq-Qazyna» ulttyq ál-aýqat qoryn basqarý jónindegi keńestiń Tóraǵasy.

V.Alekperov Elbasyǵa birlesken jobalardy iske asyrý, sonyń ishinde Kaspıı teńizindegi birqatar ken oryndaryn ıgerý arqyly Qazaqstan ekonomıkasyna salynatyn ınvestıtsııa kólemin arttyrý jospary týraly aıtyp berdi.