Elbasy London qalasynda bolǵan teraktige baılanysty kóńil aıtty
ASTANA. QazAqparat - Memleket basshysy Nursultan Nazarbaev Ulybrıtanııa jáne Soltústik Irlandııa Birikken Koroldiginiń Premer-mınıstri Tereza Meıge London qalasynda bolǵan terrorlyq aktige baılanysty kóńil aıtý jedelhatyn joldady, dep habarlaıdy Aqordanyń baspasóz qyzmeti.
Jedelhatta Ulybrıtanııa Parlamenti mańyndaǵy terrorlyq akt saldarynan beıbit turǵyndardyń qaza bolǵany týraly habardy Qazaqstan Prezıdenti zor kúızelispen qabyldaǵany aıtylǵan.
«Bul qastandyq áreketti búkil órkenıetti álemge qarsy baǵyttalǵan terrorlyq akt dep sanaımyz. Birikken Koroldiktiń halqy men úkimetine, sondaı-aq zardap shekkenderdiń týystary men jaqyndaryna qaıǵylaryna ortaqtasyp, kóńil aıtamyn», - delingen jedelhatta.
Sonymen qatar, jedelhatta Qazaqstan terrorızmniń kez kelgen túrin qatań aıyptaıtyny, halyqaralyq qoǵamdastyqty zulymdyqpen kúresý úshin kúsh jumyldyrýǵa shaqyratyny atap ótilgen.
