Elbasy qyzyǵyp oqıtyn kitaptary týraly aıtty
«Bizdiń bala kezimizde aýyldyń mektebinde kitap az bolatyn. Ol kezde kompıýter, ınternet degen joq, tek qana kitap oqıtyn edik. Sol kezde Sábıt Muqanovtyń «Botagózin», Beıimbet Maılınnyń kitaptaryn shetinen oqıtynbyz. Qazir kitap teńiz. Qaısysyn tańdap oqıtynyńdy da bilmeı qalasyń. Keıde kitapty oqıtyn ýaqyt ta joq. Degenmen, budan ketýge bolmaıdy. Oqý kerek. Al meniń qazirgi oqıtyn kitaptaryma kelsek, ol negizinen ekonomıkalyq jaǵdaı jóninde», - dedi N. Nazarbaev.
Budan bólek, Elbasy óziniń keleshekte ne bolatynyna qyzyǵatynyn da aıtty.
«Soǵan baılanysty Eýropalyq banktiń prezıdenti bolǵan, men tanıtyn Jak Attalıdyń «Bolashaqtyń qysqasha tarıhy» degen kitaby bar, sony oqyp shyqtym. Onda qazirgi jaǵdaı zerttelip, jahandyq zamannyń ǵylym men ónerdiń órkendeýi arqasynda ómirdiń ózgeretini jazylady. Men sondaıdy bilip otyrǵym keledi, kóbirek oqımyn. Sosyn burynǵy prezıdentterge úńilemin, solardy kóbirek oqımyn. Sebebi bunyń ishinde bizge kerektileri jeterlik. Sosyn jaqynda Smaǵul Elýbaevtyń kitabyn oqydym, ony buryndary da qarap júrýshi edim. Bir kezdesýimde Ábdijámil Nurpeıisov osy kisiniń kitaby jaqsy dep sony oqýǵa keńes bergen bolatyn. Sony oqydym. Sosyn Nurpeıisovtiń óziniń «Sońǵy paryz» degen kitaby da bar. Ony da oqyp shyqqanmyn. Men Smaǵul Elýbaevtyń kitaby sol Á. Nurpeıisovtiń «Qan men terine» eliktegeni bolar dep oıladym. Ekeýi de jaqsy shyqqan roman», - dedi N. Nazarbaev.
«Kitap kóp, bárin oqyp shyǵý múmkin de emes tárizdi», - dedi Elbasy.