Elbasy qytaılyq kásipkerlerdi Qazaqstanda bıznesin damytýǵa shaqyrdy
«Búginde Qazaqstan tıimdi bıznes júrgizý úshin jańa múmkinshilkter men úlken áleýet bolyp otyr. Investıtsııalyq ahýaldy jaqsartý boıynsha jumystar turaqty júrgizilip, kásipkerlik salasyndaǵy zańnamalar yryqtandyrylýda. Dúnıejúzilik banktiń «Doing Business» reıtınginde Qazaqstan búginde 36 orynda tur. Biz EYDU Investıtsııa jónindegi komıtetiniń assotsıalanǵan múshesi bolyp sanalamyz jáne Halyqaralyq ınvestıtsııalar jónindegi deklaratsııaǵa qosyldyq», - dep atap ótti Elbasy.
Memleket basshysy sheteldik ınvestorlar men bıznesmendermen ózara tıimdi is-qımyldy jolǵa qoıý maqsatynda arnaıy KazakhInvest jáne KazakhExport kompanııalarynyń qurylǵanyn atap ótti.
«Metallýrgııa, munaı hımııasy, mashına jasaý, azyq-túlik óndirisi syndy basymdyqqa ıe salalarda ınvestıtsııalyq jobalardy júzege asyrý barysynda korporatıvtik, jer jáne múlik salyqtarynan bosatý qarastyrylǵan. Mundaı salalarǵa sheteldik jumys kúshin tartý kvotasyz júzege asyrylyp, jer qoınaýyn paıdalanýǵa lıtsenzııa alý jáne kelisimsharttar jasasý sharttary jeńildetiledi. Óıtkeni, bul nysandar Qazaqstannyń ındýstrıaldy-ınnovatsııalyq damý ulttyq baǵdarlamasynyń quramyna kiredi», - dedi Nursultan Nazarbaev.
Sonymen qatar Memleket basshysy elimizde 11 arnaıy ekonomıkalyq aımaq, 24 ındýstrıaldy aımaq jumys istep turǵanyn aıtty.
«Biz qytaılyq kompanııalardy osyndaı tıimdi sharttarmen bıznesin damytýǵa shaqyramyz», - dedi Elbasy.
Aıta keteıik, Elbasy Nursultan Nazarbaev Qytaıǵa memlekettik saparmen kelip, keshe QHR Tóraǵasy Sı Tszınpınmen keńeıtilgen quramda kelissózder ótkizdi.
Nátıjesinde birneshe qujatqa qol qoıyldy.
Sonymen qatar Memleket basshysy QHR Memlekettik keńesiniń premeri Lı Ketsıanmen júzdesti.
Al 10 maýsym kúni QR Prezıdenti Tsındao qalasynda ótetin Shanhaı yntymaqtastyq uıymyna múshe memleketter basshylarynyń keńesine qatysady dep kútilýde.
