Elbasy qytaılyq bıznesmenderge «Astana» qarjy ortalyǵynyń jumysyn tanystyrdy

BEIJІŃ. QazAqparat -Búgin Qytaıǵa memlekettik sapary aıasynda osy eldiń bıznes kapıtandarymen kezdesken Elbasy Nursultan Nazarbaev «Astana» halyqaralyq qarjy ortalyǵynyń jumysy jaıynda aıtty, dep habarlaıdy QazAqparat tilshisi.

«Biz ótken jyly EKSPO-2017 kórmesin tabysty ótkizdik. Oǵan qytaılyq kompanııalar da barynsha belsendilikpen qatysty, sol úshin rızashylyǵymyzdy bildiremiz. Endigi ýaqytta atalǵan nysnadardyń ornynda «Astana» halyqaralyq qarjy ortalyǵy jumys isteı bastaıdy. Onyń quqyqtyń mártebesi konstıtýtsııalyq zańmen bekitilgen, al jumys tili aǵylshyn tili sanalady, aǵylshyn quqyǵy men táýelsiz arbıtraj qoldanylady», - dep atap ótti Elbasy.

Memleket basshysynyń aıtýynsha, «Astana» halyqaralyq qarjy ortalyǵyna qatysýshylarǵa 50 jylǵa salyqtyq jeńildikter beriledi. Valıýtalyq, vızalyq jáne quqyqtyq rejim ońaılatylady.

«Bul - óńirdegi jumysy aǵylshyn quqyǵyna negizdelgen jalǵyz ortalyq. Táýelsiz sot, halyqaralyq arbıtrajdyq ortalyq taraptardyń quqyqtarynyń ádil qorǵalýyna kepildik beredi. AHQO joǵary tehnologııaly bırjasyn qurýǵa Shanhaı qor bırjasy men amerıkalyq Nasdaq bırjasy tartyldy. AHQO-nyń jasyl, ıslamdyq, ınnovatsııalyq qarjylyq quraldardy damytýda óńirlik ortalyqqa aınalýǵa barlyq múmkinshiligi bar. Buǵan deıin aıtqanymdaı 5 shildede halyqaralyq qoǵamdastyq úshin «Astana» halyqaralyq qarjy ortalyǵynyń resmı tusaýkeserin ótkizýdi josparlap otyrmyz», - dedi Nursultan Nazarbaev.

Aıta keteıik, Elbasy Nursultan Nazarbaev Qytaıǵa memlekettik saparmen kelip, keshe QHR Tóraǵasy Sı Tszınpınmen keńeıtilgen quramda kelissózder ótkizdi.

Nátıjesinde birneshe qujatqa qol qoıyldy.

Sonymen qatar Memleket basshysy QHR Memlekettik keńesiniń premeri Lı Ketsıanmen júzdesti.

Al 10 maýsym kúni QR Prezıdenti Tsındao qalasynda ótetin Shanhaı yntymaqtastyq uıymyna múshe memleketter basshylarynyń keńesine qatysady dep kútilýde.