Elbasy Qyrǵyzstan prezıdentiniń Euronews-ke bergen suhbatyna qatysty óz oıyn bildirdi
ASTANA. QazAqparat - Elbasy Nursultan Nazarbaev Qyrǵyzstan prezıdenti Almazbek Atambaevtyń Euronews telearnasyna bergen atyshýly suhbatyna qatysty óz oıyn bildirdi, dep habarlaıdy QazAqparat.
«Jaqynda bizdiń Premer-Mınıstr bolyp keldi Qyrǵyzstanda, prezıdent Atambaev ony qabyldady. Ózimnen sondaı aǵattyq ketipti, oǵan nege kóńil bólesizder dep ol da aıtyp jatyr. Ekinshi jaǵynan uly Abaıdyń: «Qyrǵyz-qazaq bir týǵan degendi dúnıede qoldamaıtyn eshkim joq», dep aıtqan sózi bar. Sondyqtan biz kórshiles elmiz. Prezıdentter, basshylar keledi, ketedi eki halyq qalady. Oǵan onsha kóńil bóle bermeý kerek, olarda saılaý bolyp jatyr, jaǵdaılary qazir basqasha, ózgertip jatyr, parlament saılaýy da bolady. Saılaý kezinde bolady ǵoı barlyǵy. Túsindire ketetin jaǵdaı, 2010 jyldy aıtty ǵoı ol, sol jyly byt-shyt bolyp, tóńkeriske ulasyp, zańdy otyrǵan prezıdentti qulatyp, qýyp shyǵyp jatqan kezde, túrmedegi kisilerdi shyǵaryp jiberdi, barlyq sotqarlar bizge qaraı lap etken kezde japtyq shekarany, bolashaqta solaı bolatyn bolsa, taǵy da jabamyz. Qaı memleket jappaıdy shekarasyn?! Túrkııa da jaýyp jatyr, olardan kezinde Ózbekstan da japty, Tájikstan da japty. Sondyqtan, ol jerde eshkimniń kinási joq, kiná sol jerde bolǵan jaǵdaıda», - dep atap ótti Prezıdent otandyq telearnalarǵa bergen suhbatynda.
Memleket basshysynyń aıtýynsha, Qazaqstan bıligi, kerisinshe, baýyrlas, kórshiles elge kómek qolyn sozýdan jalyqqan emes, alda da kómek kórsetýge múddeli.
«Kerisinshe, eldiń ishinde azamattyq soǵys oryn almasyn dep men Bákıevti elden alyp shyqtym. Onyń tóńireginde qarýlanǵan óte úlken top bolatyn. Bishkekke baryp, barlyǵyn qıratamyz dep otyrǵan kezinde, Otýnbaeva ol kezde memlekettiń basshysy bolatyn, sonyń qolhatymen, ony alyp ketýdi suraımyz degennen keıin, ushaqtardy jiberip, áskerılerdi jiberip, men alyp shyǵyp, sony tynyshtatqanmyn. Sondyqtan oǵan mán bere berýdiń qajeti joq, saıasatker bolý úshin, el basqarý úshin, kádimgideı pildiń terisindeı, teriń bolý kerek. Ol ótimdi-ketimdi, búgin aıtty, erteń ketedi sóz degen. Árıne basshy bolǵannan keıin, ár sózdi oılanyp sóıleý kerek», - dep atap ótti Elbasy.
«Jalpy týysqan, baýyrlas eki eldiń arasyndaǵy qarym-qatynasqa sol arqyly syzat túsedi dep men oılamaımyn. Jaǵdaılary ońaı emes olardyń da. Kómektesip otyrmyz, álde de kómektese beremiz. Jaqynda biz 40 mıllıon aqsha bóldik. Shekarada zerthanalaryn únemdeý úshin, bizge et, sútin ákelý úshin 40 mıllıon dollar berdik. Men aqsha jiberip, Oshta barlyǵy qırap qalǵan kezde 2 mektep salǵyzdyrdym. Gýmanıtarlyq kómekti de berip turamyz. Sondyqtan biz aǵaıynbyz ǵoı, kórshiles. Qyrǵyzstannyń da, Ózbekstannyń da, Tájikstannyń Qazaqstanda shyǵar joly. Temirjoly da bizden, avtokólik joly da bizden, ushaqtary da bizden kelip otyrady, baılanys ta bizden. Dostyqty saqtaý kerek. Birlikti saqtaý qajet. Odan artyq qazyna joq», - dep túıdi sózin N. Nazarbaev.
Aıta keteıik, aqpan aıynda Qyrǵyzstan prezıdenti Almazbek Atambaev Euronews telearnasyna suhbat berip, el turǵyndarynyń qurban bolýyna Qazaqstandy aıyptaǵan bolatyn.
