Elbasy qyrǵyz eliniń kórnekti memleket qaıratkeri T.Úsibálıevtiń qaıtys bolýyna baılanysty A. Atambaevqa kóńil aıtty

ASTANA. QazAqparat - Memleket basshysy Qyrǵyz Respýblıkasynyń Prezıdenti Almazbek Atambaevqa sol eldiń kórnekti memleket qaıratkeri Turdaqyn Úsibálıevtiń qaıtys bolýyna baılanysty kóńil aıtý jedelhatyn joldady.

Bul týraly Aqordanyń baspasóz qyzmeti habarlady.

Jedelhatta Nursultan Nazarbaev Qyrǵyzstannyń kórnekti basshylarynyń biri, halqynyń ultjandy azamaty dúnıeden ozǵany týraly habardy zor kúızelispen qabyldaǵany aıtylǵan.

Memleket basshysy respýblıkaǵa basshylyq jasaǵan kezinde kásibı biliktiligi men adamgershilik qasıetteri arqyly kópshiliktiń qurmetine bólengen T.Úsibálıevtiń baýyrlas eldi nyǵaıtý men órkendetý isine mol úles qosqanyn atap ótti.

Sońynda Nursultan Nazarbaev Qazaqstan halqynyń jáne jeke óziniń atynan T.Úsibálıevtiń týǵan-týystary men jaqyndaryna kóńil aıtty.