Elbasy qymbat ónimderdiń ımportyn synǵa aldy
«Agroónerkásip sektorynda júıeli jumystar atqarylýda. Bul týraly Ómirzaq Shókeev (QR Premer-Mınıstriniń orynbasary-Aýyl sharýashylyǵy mınıstri) baıandady. Soltústik Qazaqstanda maı sharýashylyǵynyń aýmaǵy 2 esege - 1 mıllıon gektarǵa deıin ulǵaıdy. Elimizdegi maı sharýashylyǵy aýmaǵynyń 40 paıyzy sonda. Qumar Aqsaqalov (SQO ákimi) bıdaı ósire bergenshe, osy sharýashylyqty damytý kerektigin túsindi. Solaı ǵoı?», - dedi Nursultan Nazarbaev.
Memleket basshysy sonymen birge Almaty oblysyndaǵy qant qyzylshasynyń ónimdiligine joǵary baǵa berdi. Degenmen, ózimizde bar ónimder áli de bolsa syrttan jetkiziletinin aıtty.
«Biz áli kúnge deıin etti shetten ımporttap otyrmyz. Sút ónimderi, jemis-jıdek pen kókónis ónimderin bolsyn... Tipti qus etiniń jartysyn shetten ákelemiz. Árbir jylda, árbir aıda qaıdan, qandaı ónim ákelinip jatqany, ol jumyspen kimniń aınalysatyny, bári de Premer-Mınıstrdiń aldyndaǵy taqtada jazylyp turý kerek», - dedi Elbasy.
Onymen birge, Nursultan Nazarbaev ımporttyq ónimderdiń barlyǵy qymbat ekenin atap ótti.
«Bári de qymbat. Importtyq kıim de, tamaq ta qymbat. Iá, keıbir ónimderdi ózimiz óndirmeıtinimizdi bilemin. Dese de, solaı emes pe, Ómirzaq (Ómirzaq Shókeev - avt.)? Árbir ónim túri boıynsha naqty jumys júrgizelik», - dedi Prezıdent.
Óz kezeginde bul máselelerdi sheshý úshin Ómirzaq Shókeev jańa kombınattar salý kerektigin atap ótti.
«Endeshe sal. Halyq úshin áleýmettik mańyzy bar taýarlardyń tarıfterin de baqylaýǵa alýymyz kerek», - dedi Memleket basshysy.
Buǵan deıin Elbasy Úkimet múshelerin otandyq kıim óndirisine, sonyń ishinde jastar shyǵaryp otyrǵan ónimderge nazar aýdarýdy tapsyrǵan bolatyn. Sondaı-aq jylyna 60 myń tonna et eksporttaý josparynyń oryndalýyna qatysty jaýap aldy.
Eske sala ketsek, Astanada QR Prezıdentiniń tóraǵalyǵymen Úkimettiń keńeıtilgen quramdaǵy otyrysy ótip jatyr.
