Elbasy QR Prezıdentiniń ókilettigin 10 jylǵa uzartý jónindegi referendýmdy ótkizý týraly bastamany qoldaǵan barsha qazaqstandyqtarǵa shynaıy rızashylyǵyn bildirdi

"Men búkilhalyqtyq senim bildirgeni úshin barsha qazaqstandyqtarǵa shynaıy rızashylyǵymdy bildiremin. Bastamashyl topqa, depýtattarǵa jáne «Qazaqstan-2020» demokratııalyq kúshterdiń búkilhalyqtyq koalıtsııasyna alǵys aıtamyn. Bul - ekonomıkalyq damý jáne elimizdi áleýmettik jańǵyrtýdaǵy baǵdarymyzǵa búkilhalyqtyq qýatty qoldaý men senimniń aıqyn aıǵaǵy. Men úshin óz halqymnyń qaltqysyz qoldaýynan artyq bıik baǵa bolmaıdy", - dedi Memleket basshysy búgin Aqordada QR Konstıtýtsııalyq Keńesiniń QR Prezıdentiniń ókilettigin referendýmda uzartý máselesi boıynsha Ata Zańǵa engizilgen ózgertý men tolyqtyrýdy QR Konstıtýtsııasyna sáıkes emes dep tanyǵany týraly qaýlysyna qatysty Qazaqstan halqyna arnaǵan Úndeýinde.

Prezıdent: "Bastamashyl toptyń osy usynys arqyly Elbasy ókilettigin 10 jylǵa uzartý ǵana emes, elimizdiń órkendeýi jáne qoǵamdyq turaqtylyqty nyǵaıtý baǵytyndaǵy irgeli isterdi jalǵastyrýdy kózdegenine senemin", - dedi.

N. Nazarbaev Úndeýiniń basynda: "Búgin, 2011 jylǵy 31 qańtar kúni Konstıtýtsııalyq Keńes Ata Zańymyzǵa Qazaqstan Respýblıkasy Tuńǵysh Prezıdentiniń ókilettigin respýblıkalyq referendým arqyly uzartýdy qarastyratyn ózgerister men tolyqtyrýlar engizý týraly Zańnyń quqyqtyq taǵdyry týraly sheshimin shyǵardy. Parlament depýtattary bul zańdy referendýmdy qoldaý jónindegi úndeýge qoldaryn qoıǵan bes mıllıonnan astam qazaqstandyqtyń qalaýyn basshylyqqa ala otyryp qabyldaǵan bolatyn. Bul bastamany men óz Jarlyǵymmen qabyldamaı tastadym. Alaıda, Parlament konstıtýtsııalyq quqyǵyn paıdalanyp, atalǵan zańdy qabyldady. Konstıtýtsııalyq Keńes Parlament qabyldaǵan sheshimdi qarap, Zańdy Konstıtýtsııaǵa sáıkes kelmeıdi dep moıyndady. Munymen Konstıtýtsııalyq Keńes osy máselede respýblıkalyq referendým ótkizý múmkindigin joqqa shyǵarmaıdy. Men qabyldanǵan sheshimmen kelisemin.Osylaısha, kúrdeli saıası ahýal qalyptasty. Bul meni Memleket basshysy retinde tarıhı jaýapkershiliktiń bar júgin moınyma alyp, referendýmnyń taǵdyry týraly sheshim qabyldaýǵa mindetteıdi", - dep atap kórsetti.

Budan buryn habarlaǵanymyzdaı, Elbasy Nursultan Nazarbaev Qazaqstan Respýblıkasy Prezıdentiniń ókilettigin 2020 jyldyń 6 jeltoqsanyna deıin uzartý jónindegi referendýmdy ótkizbeý týraly sheshim qabyldady. Memleket basshysy Qazaqstanda merziminen buryn Prezıdent saılaýyn ótkizý týraly Parlamentke usynys engizetin bolady.

"Bir jaǵynan, men saılaýshylardyń basym kópshiligin quraıtyn búkilhalyqtyq bastamany keri qaıtara almaımyn. Máseleniń ekinshi qyry, men Elbasy jáne Konstıtýtsııanyń kepili retinde bolashaq saıasatkerlerge jańylys baǵyt silteıtin iske jol bere almaımyn. Sondyqtan, meni halyq durys túsinedi dep senemin. Biz bul jaıtty jaı «qabyldaý nemese bas tartý» retinde emes, ómirdiń ózi usynǵan demokratııanyń tarıhı sabaǵy dep qabyldaǵanymyz jón. Bul - Elbasy men halyqtyń Ata zańǵa adaldyǵyn baǵamdaıtyn taǵylymdy dáris. Demokratııalyq jolmen saılanǵan tuńǵysh Prezıdent retinde elimizdiń bıik múddelerin basshylyqqa ala otyryp, men referendým ótkizbeý týraly sheshim qabyldadym. Jurtshylyqty bóletin «referendým álde saılaý» degen tańdaýdyń ornyna men halqymyzdyń erki men demokratııalyq qaǵıdattarǵa adaldyǵyn eskeretin jáne bizdi biriktiretin joldy usynamyn. Men ókilettigimniń eki jylǵa qysqaratynyna qaramastan, merziminen buryn Prezıdent saılaýyn ótkizý týraly usynys engizemin. Tıisti Zań Parlamentke usynylady", - dedi Memleket basshysy.

"Qadirli qazaqstandyqtar! Sizderdiń qoldaýlaryńyz men úshin memleket pen halyq múddesi jolynda qashanda senim men shyndyqtan aınymaı qyzmet etýge kúsh beretin bastaý bolady. Aldymyzda áli atqarylatyn qyrýar ister bar. Biz ındýstrıaldy-ınnovatsııalyq jáne áleýmettik jańǵyrtý baǵdarlamalaryn batyl iske asyrýdamyz. Birge keńese otyryp oıǵa alǵan josparlarymyzdy iske asyramyz jáne Otanymyzdy gúldendire túsemiz dep kámil senemin. Biz kemel keleshegimizdiń berik irgesin birge qalaımyz!", - dedi Elbasy.