Elbasy qojaıyndary mindettemelerin oryndamaı otyrǵan energostansylardy memlekettiń menshigine qaıtarýdy tapsyrdy
Prezıdent bul tapsyrmany búgin Aqordada Úkimet músheleriniń jáne ákimderdiń qatysýymen ótken ındýstrııalyq damýǵa qatysty keńeste berdi, dep habarlaıdy QazAqparat.
«Bizdegi elektr stansylary, jylý núkteleri jeke menshiktiń qolynda, tapqan paıdalaryn olar qaltalaryna basýda. Olar elektr energııasyn óndiretin qýattardy satyp alǵan kezderinde olarǵa ınvestıtsııa salýǵa ýáde bergen bolatyn. Osy jyldar ishinde olar sol nysanǵa qandaı ınvestıtsııa salǵanyn tekserý qajet. Investıtsııa salmady ma, ıaǵnı kelisimsharttardy oryndamady degen sóz, olardy memleketke qaıtarý qajet», dedi keńeste N. Nazarbaev.
Elbasy energııany únemdeýshi uıymdardyń kórsetetin qyzmetteri tarıfteri ósimin memleket toqtatyp qoıa almaıtynyn atap kórsetti. «Eger biz bárin búldirgimiz kelmese, onda bul isti jalǵastyratyn bolamyz. Alaıda, barlyǵy mynany uǵynýy tıis: tarıfter jaıdan-jaı ósirilmeıdi. Eger biz jylýdyń, elektr energııasynyń der kezinde berilgenin qalasaq, biz stansylar men jelilerdi jóndeýimiz jáne oǵan jańa tehnologııalardy ákelýimiz kerek», dedi Elbasy. «Elektr stansylarynyń jumysy toqtap qalmas úshin biz tarıfterdi kóterýge májbúr bolyp otyrmyz dep halyqqa týra aıtyńyzdar», dedi Prezıdent ákimderge qaratyp aıtqan sózinde.
